Таиландда ўзбекистонлик 37 ёшли эркак вояга етмаган қизга жинсий тажовуз қилгани учун ҳибсга олинди
Қонунчиликка кўра, гумонланувчи 10 йилгача қамоқ жазосига ҳукм қилиниши мумкин.
Таиландда 37 ёшли Ўзбекистон фуқароси 16 ёшли вояга етмаган қизга нисбатан жинсий тажовуз содир этганликда гумонланиб ҳибсга олинди. Унга нисбатан 10 йилгача озодликдан маҳрум қилиш жазоси қўлланиши мумкин.
The Pxuket News нашрининг хабар беришича, ҳодиса 11 январь куни соат 22:20 атрофида Пхукет оролининг Май Кҳао ҳудудида жойлашган Голден Сат ресторанида содир бўлган.
Маълум қилинишича, маҳаллий ҳудудда яшовчи 16 ёшли қиз ҳожатхонадан чиқаётган пайтда эркак томонидан тўхтатилган. Гумонланувчи уни мажбуран орқага тортиб, номақбул ҳаракатлар қилган. Қизнинг қичқириғини эшитган ресторан мижозлари воқеа жойига етиб келиб, эркакни ҳуқуқни муҳофаза қилувчи органлар етиб келгунига қадар ушлаб турган.
Шундан сўнг гумонланувчи полиция томонидан бўлимга олиб кетилган.
Таъкидланишича, мазкур ҳолат Таиланднинг вояга етмаганларга нисбатан жинсий дахлсизликни ҳимоя қилувчи қатъий қонунлари доирасида кўриб чиқилмоқда. Амалдаги қонунчиликка кўра, розиликсиз тегиниш оғир жиноят ҳисобланади ва 10 йилгача озодликдан маҳрум қилиш жазоси билан жазоланади.
