Тошкент метросида 19 та бекатдаги чипта кассалари ёпилади
Чипта кассалари ўрнига QR-чипталар учун ахборот киосклари ўрнатилади.
2026 йил 1 февралдан бошлаб Тошкент метрополитенида айрим бекатлардаги чипта кассаларини босқичма-босқич ёпилади. Мазкур чора рақамли тўлов тизимларини кенг жорий этиш ҳамда йўловчиларга автоматлаштирилган хизмат кўрсатишни ривожлантириш доирасида амалга оширилмоқда.
Метрополитен маъмурияти маълумотига кўра, дастлабки босқичда 19 та бекатда чипта кассалари фаолияти тўхтатилади. Улар қаторига Мустақиллик майдони, Амир Темур хиёбони, Чорсу, Ойбек, Туркистон каби йирик бекатлар, шунингдек Чилонзор, Ўзбекистон, Юнусобод ва Сергели йўналишларидаги айрим бекатлар киради.
Чипта кассалари ўрнига бекат вестибюлларида бир марталик QR-кодли чипта харид қилиш имконини берувчи ахборот киосклари ўрнатилади.
Таъкидланишича, ҳозирги кунда йўловчилар 10 дан ортиқ тўлов усулларидан фойдаланишлари мумкин. Жумладан, банк карталари, транспорт карталари, мобил иловалар, шунингдек Face ID ва PalmPay каби биометрик тўлов хизматлари мавжуд.
Биринчи босқич якунлари ва йўловчиларнинг фикр-мулоҳазалари таҳлил қилингач, бошқа бекатларда ҳам чипта кассаларини ёпиш масаласи кўриб чиқилади.
