Тошкент туманидаги дорихона омборида йирик қонунбузарликлар аниқланди

 

 

ДХХ Тошкент вилояти бўйича бошқармаси ҳамда ҳуқуқни муҳофаза қилувчи бошқа идоралар ҳамкорлигида ўтказилган тезкор тадбирда Тошкент туманида фаолият юритувчи дорихоналардан бирига тегишли омборхона белгиланган тартибда кўздан кечирилди. Текширув жараёнида омборда 1 209 турдаги, умумий қиймати қарийб 38 миллиард сўмлик дори воситалари мавжудлиги аниқланди. Бу ҳақда Zamon.uz га ДХХ ҳабар берди.

 

Аниқланишича, ушбу дориларнинг тахминан 20 миллиард сўмлик қисми халқаро ГДП (сақлаш, ташиш ва реализация) сертификатига эга бўлмаган, шунингдек, Фармацевтика тармоғини ривожлантириш агентлиги ҳузуридаги Сертификатлаш органидан лицензия олмасдан сақланиб келинаётган. Бундан ташқари, омбордаги 30 турдаги 10 509 қути дори воситаларининг яроқлилик муддати ўтган бўлиб, уларнинг умумий қиймати 263 миллион 921 минг сўмни ташкил этади. Яна 3 турдаги 639 қути дори ва 243 дона гел воситасининг яроқлилик муддати қалбакилаштирилгани маълум бўлди.

 

“Фармацевтика маҳсулотлари хавфсизлиги маркази” ДУК хулосасига кўра, дорихона мансабдор шахслари томонидан дори воситалари лицензияда кўрсатилмаган жойда сақланган, 10 турдаги дори воситалари учун мувофиқлик сертификати расмийлаштирилмаган, 1 турдаги дори воситаси контрафакт тарзда тайёрланган, 9 турдаги дори воситалари давлат рўйхатидан ўтказилмаган ҳамда 20 турдаги муддати ўтган дорилар белгиланган тартибда йўқ қилинмаган. Шу сабабли ушбу дори воситаларини Ўзбекистон ҳудудида сақлаш, сотиш, ташиш ва тиббиёт амалиётида қўллаш қатъиян тақиқланди.

 

Мазкур ҳолат юзасидан дорихона мансабдор шахсларига нисбатан Жиноят кодексининг 186³-моддаси 3-қисми «а» банди билан жиноят иши қўзғатилиб, ҳозирда тергов ҳаракатлари олиб борилмоқда.