Тошкентда аёллар тунда жанжаллашди
Ҳолат юзасидан шаҳар ИИББ маълумот берди.
Ижтимоий тармоқларда икки нафар аёл ўртасида келиб чиққан жанжал акс этган видео тарқалиб, кенг муҳокамаларга сабаб бўлди. Мазкур ҳолат юзасидан Тошкент шаҳар Ички ишлар бош бошқармаси расмий маълумот берди.
Қайд этилишича, воқеа жорий йилнинг 15 январь куни соат 23:55 лар атрофида Миробод тумани Амир Темур кўчасида жойлашган кафелардан бири олдида содир бўлган. 2000 йилда туғилган М.Н. ва 1992 йилда туғилган И.Г. ўртасида тортишув юзага келиб, у ўзаро жанжалга айланган.
Дастлабки аниқлашларга кўра, ушбу ҳолат оқибатида томонлардан ҳеч бири тан жароҳати олмаган. Можаро қисқа вақт ичида якунланган ва оғир оқибатларга олиб келмаган.
Ҳозирда мазкур воқеа юзасидан Миробод тумани ИИО ФМБ томонидан терговга қадар текширув ишлари олиб борилмоқда. Текширув якунига кўра, амалдаги қонунчилик асосида қонуний қарор қабул қилиниши таъминланиши маълум қилинди.
