Тошкент шаҳрида фуқаро томонидан уйини таъмирлаш жараёнида қурол-аслаҳа, ўқ-дорилар ҳамда портловчи моддалар топилди. Бу ҳақда Ички ишлар вазирлиги матбуот хизмати маълум қилди.
Қайд этилишича, жорий йилнинг 2 декабрь куни 1987 йилда туғилган фуқаро Тошкент шаҳар Ички ишлар бош бошқармасининг 102 қисқа рақамига мурожаат қилиб, яшаш хонадонида таъмирлаш ишлари олиб борилаётган пайтда ертўладан қурол ва ўқ-дорилар аниқланганини ҳамда уларни ихтиёрий равишда топшириш ниятида эканини билдирган.
Ҳодиса жойига етиб борган ҳуқуқ-тартибот органлари ходимлари томонидан фуқаронинг яшаш хонадони ертўласида бир дона RGD-5 қўл гранатаси, TOZ-8 русумли битта ўқотар қурол, IJ-27E русумли битта ўқотар қурол, портлатиш қурилмаси, беш дона қўл гранатаси запали, бир дона электродетонатор ва унга тегишли портловчи шнур, шунингдек, 546 дона турли хил жанговар ўқ-дорилар ҳамда 1100 дона пневматик қурол ўқлари ва ўткир тиғли буюмлар мавжудлиги аниқланди.
Тезкор суриштирувлар давомида ушбу қурол-аслаҳа, ўқ-дорилар ва портловчи моддалар фуқаронинг марҳум отасига тегишли бўлгани маълум бўлди. У илгари Мудофаа вазирлигининг турли бўлинмаларида хизмат қилган ҳамда Мудофаа вазирлиги ҳузуридаги Қуролли кучлар академиясидан нафақага чиққан.
Ички ишлар вазирлиги ноқонуний равишда қурол, ўқ-дори ва портловчи моддаларни сақлаш, олиб юриш ёки уларни ихтиёрий топширмаслик ҳолатлари аниқланган тақдирда, тегишли шахслар Ўзбекистон Республикаси Жиноят кодексининг 248-моддасига мувофиқ, икки йилдан беш йилгача озодликдан маҳрум этилиши мумкинлигини эслатиб ўтди.