Тошкент шаҳрида “Google” компанияси ҳамкорлигида ташкил этилган “GDG Tashkent DevFest 2025” халқаро технология фестивали бўлиб ўтди. Тадбир инглиз тилида ўтказилди ва унда Google Developers Group (GDG) етакчилари, Google Developer Expertлар ҳамда бир қатор халқаро компаниялар мутахассислари иштирок этди.
GDG — Google технологияларига қизиқувчи ишлаб чиқувчилар ва IT мутахассисларининг глобал ҳамжамияти бўлиб, Ўзбекистонда 2019 йилда ташкил этилган. Ҳамжамият бугунга келиб 8 900 дан зиёд аъзоларга эга. Ўтган йили DevFest 2024 тадбирида 3 000 киши қатнашган бўлса, бу йилги фестивалда 5 000 дан ортиқ иштирокчи жамланди.
Тадбир давомида генератив сунъий интеллект, Cloud архитектураси, Machine Learning, Android, Flutter, Firebase каби йўналишларда маҳорат дарслари, амалий машғулотлар ва презентациялар ўтказилди. EXPO ҳудудида 10 дан ортиқ технология компаниялари ўз хизматларини тақдим этди, шунингдек 15 та workshop ташкил қилинди.
Фестивалда АҚШ, Польша, Россия, Румыния, Малайзия ва БААдaн мутахассислар иштирок этди. Улар орасида Ўзбекистон рақамли технологиялар вазири Шерзод Шерматов, Google муҳандиси Олег Арвин, Mohirdev асосчиси ва NLP инженерӣ Адҳам Зоҳиров, TikTok компанияси вакили Дарханбек Мамателиёв, Yandex мутахассиси Алексей Приходко, Bank of America ходими Исломбек Абдулхатов, Pinterest вакили Диёрбек Садуллаев каби маърузачилар бор.
Адҳам Зоҳиров “Human-AI Collaboration” мавзуcидаги чиқиши давомида сунъий интеллектнинг инсон билан ҳамкорликда ривожланиши, AI моделларини ўқитишда сифатли маълумотлар муҳимлиги ва AI воситаларидан фойдаланиш орқали тезроқ натижаларга эришиш мумкинлиги ҳақида сўз юритди.
“GDG Tashkent DevFest 2025” Ўзбекистон IT ҳамжамияти учун глобал тажриба алмашинуви, янги технологиялар билан яқиндан танишиш ва халқаро мутахассислар билан мулоқот қилиш имкониятини яратди.