Тошкент шаҳар Мирзо Улуғбек туманида тезкор тадбир ўтказилгани натижасида 2007 йилда туғилган қиз ва 2003 йилда туғилган талаба йигит ижарада яшайдиган хонадонда синтетик гиёҳвандлик воситалари тайёрланган нарколаборатория ташкил этгани аниқланди. Бу ҳақда Тошкент шаҳар ИИББ матбуот хизмати хабар берди.
Маълум бўлишича, мазкур шахслар 2025 йил сентябрь ойидан буён Telegram орқали нарко дўкон куратрлари топшириқлари асосида синтетик гиёҳвандлик моддаларини тайёрлаб келган. Тезкор тадбирда лабораториядан 1 кг мефедрон ва унда қўлланган асбоб-ускуналар ашёвий далил сифатида олинди.
Қўлга олинган талаба йигитнинг мобил телефонидан олинган геолокация маълумотлари орқали Янгиҳаёт туманидаги дала майдонида «закладка» усулида кўмиб қўйилган яна 1 кг синтетик гиёҳвандлик воситалари топилган. Давом эттирилган тезкор қидирув тадбирлари натижасида Тошкент шаҳри ҳудудидаги синтетик гиёҳвандлик воситалари тарқатилишида иштирок этган 9 нафар закладчик ҳам ушланган. Уларнинг уч нафари пойтахтнинг нуфузли олий таълим муассасалари талабалари бўлган. Қолган 6 нафар шахс орасида оилавий фаолият билан шуғулланиб келаётганлар ҳам бор.
Тезкор тадбирлар натижасида умумий 2 кг синтетик гиёҳвандлик воситалари (10 минг дозага тенг) тарқалиши олди олинди.
Ҳозирда ушбу жиноий гуруҳ аъзоларига нисбатан Ўзбекистон Республикаси Жиноят кодексининг 273-моддаси 3-қисми «б» банди билан жиноят иши қўзғатилган ва тергов ҳаракатлари олиб борилмоқда.