Трамп ва Зоҳран Мамдани Оқ уйда учрашди, учрашув дўстона ва конструктив ўтди
Сайлов кампанияси чоғида Трамп унинг сайланишига қарши чиқиб, ҳатто уни “коммунист” деб атаган, Мамдани эса президентни “деспот” ва “фашист” дея танқид қилган эди.
АҚШ президенти Доналд Трамп Оқ уйдаги Овал кабинетда яқинда сайланган Нью-Йорк мери Зоҳран Мамдани билан учрашди. Аввалдан бир-бирини кескин танқид қилиб келган икки сиёсатчи ўртасидаги илк учрашув кутилганидан анча илиқ ва конструктив руҳда ўтди.
BBC'нинг Вашингтондаги мухбири Бернд Дебуссманнинг хабар беришича, Трамп Мамданига самимий муносабат билдирган ва Оқ уй янги мерга ҳамкорлик қилиши, “кутилганидан ҳам кўпроқ масалаларда келишувга эришилиши”ни таъкидлаган.
“Бизнинг умумий мақсадимиз бор — севган шаҳримизнинг равнақи”, деди Трамп.
Мамдани эса президентнинг учрашув давомида зиддиятларга эмас, балки Нью-Йорк аҳолисига хизмат қилишдек умумий вазифага урғу берганини алоҳида қайд этди.
Демократлардан номзод бўлган 34 ёшли Мамдани ноябрь бошида ўтказилган сайловда ғалаба қозонган эди. Сайлов кампанияси чоғида Трамп унинг сайланишига қарши чиқиб, ҳатто уни “коммунист” деб атаган, Мамдани эса президентни “деспот” ва “фашист” дея танқид қилган эди.
Шунга қарамай, Оқ уйдаги учрашувда кайфият ижобий бўлиб, сиёсатчилар журналистлар саволларига ҳазил аралаш муносабат билдирди. Трамп Мамданининг илгари айтган кескин таърифларига изоҳ берар экан, “Мени бундан ҳам ёмон сўзлар билан аташган, бу унчалик катта муаммо эмас”, деди. Саволга жавобан Мамданининг жилмайиб “ҳа” деб тасдиқлаши учрашувдаги юмшоқ оҳангни янада мустаҳкамлади.
Томонлар қатор масалаларда фарқли позицияни сақлаб қолган бўлсада, учрашувда муҳим долзарб мавзулар — жиноятчиликка қарши кураш, шаҳар хавфсизлиги ва аҳолининг ижтимоий ҳимояси бўйича ҳамкорлик имкониятлари муҳокама қилинди. Мамдани ICE агентликлари томонидан ўтказилаётган рейдлар борасида норозиликларни кўтарганини айтди. Трамп эса суҳбат асосан жиноятчилик мавзусига қаратилганини билдирди.
34 ёшли Зоҳран Мамдани — Нью-Йорк тарихидаги энг ёш мерлардан бири, шунингдек, мусулмон бўлган биринчи мер ва афро-америкалик (Угандада туғилган) мер ҳисобланади. Унинг тезкор сиёсий юксалиши Реутерс агентлиги томонидан Демократик партия ичидаги муҳим ўзгаришлар белгиси сифатида баҳоланмоқда.
