Трамп яна 5 та янги давлат фуқаролари учун АҚШга киришни тақиқлади — рўйхатда Ўзбекистон борми?
Қўшма Штатларга тўлиқ ва қисман кириши тақиқланган мамлакатлар сони 39 тага етди.
АҚШ президенти Доналд Трамп Қўшма Штатларга кириши тақиқланган давлатлар рўйхатини кенгайтирди. Бу ҳақда 16 декабрь куни Оқ уй расмий веб-сайтида маълум қилинди дейди meduza нашри.
Қарорга кўра, Буркина-Фасо, Мали, Нигер, Жанубий Судан ва Сурия фуқаролари учун АҚШга кириш тўлиқ тақиқланган. Шунингдек, Фаластин маъмурияти томонидан берилган ҳужжатларга эга шахсларга нисбатан ҳам чекловлар жорий этилди. Шу тариқа, тўлиқ кириш тақиқланган мамлакатлар сони 17 тага етди.
Бундан ташқари, АҚШ расмийлари фуқаролари учун қисман кириш чекловлари қўлланиладиган давлатлар рўйхатини ҳам кенгайтирди. Эндиликда ушбу рўйхатга Ангола, Антигуа ва Барбуда, Бенин, Кот-дЪИвуар, Доминика, Габон, Гамбия, Малави, Мавритания, Нигерия, Сенегал, Танзания, Тонга, Замбия ва Зимбабве киритилган.
Трамп маъмурияти мазкур қарорларни ушбу мамлакатларда коррупция даражасининг юқорилиги ҳамда сохта ҳужжатлар билан боғлиқ хавфлар мавжудлиги билан изоҳлади.
Аввалроқ, Доналд Трамп Афғонистон ва Эронни ўз ичига олган 12 мамлакат фуқаролари учун АҚШга киришни тақиқловчи фармонни имзолаган, Куба, Венесуэла ва Туркманистон каби яна етти давлат фуқаролари учун эса қисман чекловлар жорий этилган эди.
Шунингдек, ноябрь ойида Оқ уй чекловлар жорий қилинган давлатлардан келган 19 мамлакат фуқароларининг доимий яшаш ҳужжатлари — “яшил карта”ларни қайта кўриб чиқиш режалаштирилаётганини эълон қилган. Доналд Трамп бундан ташқари “учинчи дунё мамлакатлари”дан иммиграцияни кескин чеклаш ниятида эканини билдирган.
Мазкур чоралар ноябрь ойи охирида АҚШ билан илгари ҳамкорлик қилган Афғонистон фуқароси томонидан Оқ уй яқинида Миллий гвардия аскарларига қарата ўқ узилиши ортидан эълон қилинган. Ушбу ҳодиса оқибатида аскарлардан бири ҳалок бўлган.
