Туркияда мураккаб вазиятга тушиб қолган ўзбеклар Ватанга қайтарилди
Истанбулдаги Бош консулхона фуқароларга зарур ёрдамни кўрсатган.
Ўзбекистоннинг Истанбул шаҳридаги Бош консулхонаси ва Миграция агентлиги ваколатхонаси томонидан оғир аҳволга тушиб қолган юртдошимиз ҳамда унинг 12 ёшли қизи Ватанга қайтарилди. Туркияда меҳнат мақсадида бўлган аёл оғир хасталик сабабли ишлай олмай қолганидан сўнг дипломатик ваколатхонага мурожаат қилган.
Маълум бўлишича, ҳамюртимизнинг оёғи цинган бўлиб, жарроҳлик амалиёти ва протез ўрнатиш жараёнлари шифокорлар назоратида муваффақиятли амалга оширилган. Узоқ вақт даволаниш ва ишга лаёқатсизлик туфайли оиланинг молиявий аҳволи оғирлашгани инобатга олиниб, зарур моддий ёрдам кўрсатилди. Шунингдек, қизининг ҳам махсус парваришга муҳтожлиги аниқланган.
Бош консулхона ташаббуси билан “Ўзбекистон маданияти, бирдамлик ва ҳамкорлик жамияти”, “Узбекистан Аирвайс” авиакомпаниясининг Туркиядаги вакиллиги ҳамда диаспора ташкилотлари кўмагида она ва қиз уйга етказилди. Айни пайтда уларнинг даволаниш ва реабилитация жараёнлари Ижтимоий ҳимоя миллий агентлиги, Оила ва хотин-қизлар қўмитаси ҳамда маҳаллий ҳокимият органлари билан ҳамкорликда давом эттирилмоқда.
