Украина шарқидаги воқеаларга биринчи бўлиб Оқ уй муносабат билдирди.
АҚШ президенти Жо Байден Россиянинг Донбассдаги ҳарбий операциясини “ўзини оқламайдиган” деб баҳолади.
"Ушбу ҳужум оқибатида бериладиган қурбонлар ва вайронкорлик учун Россия жавобгар бўлади. АҚШ, унинг ҳамкорлари ва иттифоқчилари ягона ва қатъий жавоб беради. Дунё Россияни жавобгарликка тортади", — деган у.
У Украина атрофидаги воқеаларни диққат билан кузатиб боришини маълум қилган.
Шунингдек, Байден можарони кузатиши ва G7 етакчилари билан учрашув ташкил қилишини ҳам айтди. Шундан сўнг Америка етакчиси АҚШ аҳолисига мурожаат билан чиқади.
“Биз шунингдек НАТО бўйича иттифоқчиларимиз билан ҳаракатларимизни мувофиқлаштирамиз”, - деди Байден.
Айни пайтда Буюк Британия бош вазири Борис Жонсон Москва “Украинага ҳужум қилиб, қон тўкиш йўлини танлагани”ни таъидлади.
“Мен Украинадаги даҳшатли воқеалардан ҳайратдаман. Президент Зеленский билан сўҳбатлашиб, кейинги қадамларимизни муҳокама қилдим. Президент Путин қон тўкиш ва вайронкорлик йўлини танлади. Буюк Британия ва иттифоқчиларимиз бунга қатъий жавоб қайтаради”, - деб ёзган Британия бош вазири ўз Twitter саҳифасида.
Еврокомиссия раҳбари Урсула фон дер Ляйен Россиянинг махсус ҳарбий операциясини танқид қилиб, Москвани жавобгарликка тортишини айтди.
Латвия бош вазири Кришьянис Кариньш эса НАТОни Шимолий атланта альянси уставининг 4-моддаси (ҳудудий яхлитликка хавф солиш) бўйича консультация ўтказишга чақирди. Европа иттифоқининг Украинадаги миссияси раҳбари Матти Маасикас ЕИнинг Киевдаги ходимлари ҳақида қайғуришини билдирди.
Япония ҳукумати эса айни пайтда Донбассдаги вазият ҳақида маълумот тўплаётганини билдирди. Маълумотлар ўрганилиши тугаши билан ҳукумат асосий давлатлар, жумладан, G7 мамлакатлари билан аниқ ҳаракатларни амалга оширишга ўтмоқчи.
“Вазият жуда жиддий. Биз жаҳон ҳамжамияти билан яқин ҳамкорликда ҳаракатланмоқчимиз”, - Япония бош вазири Фумио Кусида.
У ўзининг асосий вазифаси Япония фуқаролари хавфсизлигини таъминлаш эканини таъкидлади.