Уруш натижасида Украина 100 йилга ортда қолди
“Украина ўзини йўқ қилиб бормоқда”, — деди АҚШ вакили.
АҚШ Давлат котиби Марко Рубио Россия билан уруш туфайли Украина бир асрга ортга қайтганини таъкидлади. Бу ҳақида у 30 январь куни журналист Меган Келли билан суҳбатда айтиб ўтди.
“Украина 100 йил ортга қайтди, унинг энергия тизими вайрон бўлди. Буларнинг барчасини тиклаш учун кимдир тўлов қилиши керак. Яна қанча украиналик ўз юртидан чиқиб кетди ва ҳозир бошқа мамлакатларда яшамоқда? Улар ҳеч қачон қайтмаслиги мумкин. Бу эса Украинани оғир келажак кутаётганини англатади”, — деди Рубио.
Унинг сўзларига кўра, аввалги АҚШ маъмурияти Украинани Россияни мағлуб этиш ва ҳаттоки йўқ қилиш мумкинлигига ишонтирди, бироқ уруш давом этиши мамлакатни тобора кўпроқ вайронага айлантирмоқда.
“Биз ҳеч қандай ечимга олиб бормайдиган, узоқ давом этадиган можарони молиялаштирмоқдамиз. Украина ўзини йўқ қилиб, тобора кўпроқ ҳудудларини йўқотмоқда”, — деди АҚШ расмий вакили.
Рубио Украинага қарор қабул қилиш қийин бўлишини тан олиб, Зеленский реалликни қабул қилиши кераклигини таъкидлади. У урушни тўхтатиш ва музокаралар йўли билан томонларнинг келишувга бориши муҳимлигини қайд этди.
Комила Одилова тайёрлади
