Венесуэла АҚШ томонидан амалга оширилган ҳужумлар ортидан Бирлашган Миллатлар Ташкилоти Хавфсизлик Кенгашининг фавқулодда йиғилишини чақиришни сўради. Бу ҳақда мамлакат ташқи ишлар вазири Иван Гил маълум қилди. Унинг айтишича, Каракас Вашингтоннинг ҳаракатларини “жинояткорона тажовуз” сифатида баҳоламоқда. Бу ҳақда A News хабар бермоқда.
Вазир Гил Telegram орқали берган баёнотида БМТ Хавфсизлик Кенгаши халқаро ҳуқуқни ҳимоя қилиш учун масъул асосий орган эканини таъкидлади. “Ҳеч қандай қўрқоқона ҳужум халқимиз иродасини синдира олмайди. Венесуэла халқи бу синовдан ҳам ғолиб бўлиб чиқади”, — деди у. Расмийларга кўра, АҚШ ҳужумлари бир неча ҳудудларда фуқаролик ва ҳарбий объектларга зарар етказган, мамлакатда фавқулодда ҳолат эълон қилинган.
АҚШ президенти Дональд Трамп эса Truth Social платформасида Венесуэлага қарши “кенг кўламли зарбалар” берилганини тасдиқлади. У, шунингдек, Венесуэла президенти Николас Мадуро ва унинг рафиқаси қўлга олиниб, мамлакатдан олиб чиқиб кетилганини даъво қилди. Мазкур баёнот халқаро майдонда кескин муносабатларга сабаб бўлиб, вазиятнинг янада кескинлашишидан хавотирлар кучаймоқда.