Хитойда аёллар бегоналарни қучоқлагани учун пул тўламоқда
Стрессдан халос бўлишнинг янги усули оммалашмоқда.
Хитойда янги ва ноодатий психологик хизмат тобора оммалашиб бормоқда: ёлғизлик ва стрессдан чарчаган аёллар бегона эркакларни қучоқлаш эвазига пул тўламоқда.
Қучоқлаш хизматининг машҳурлиги ортиб бораётгани бежиз эмас. Аёлларнинг сўзларига кўра, қисқа муддатли жисмоний яқинлик (ҳатто нотаниш инсон билан бўлса ҳам) уларга руҳий таскин, хавфсизлик ҳисси ва сокинлик бағишлайди. Ушбу хизмат нархи 5 дақиқа учун 7 долларни ташкил этади.
Маҳаллий аёллардан бири ўз бошидан ўтган воқеани интернетда баҳам кўрди: у диссертация ёзиш босқичида оғир стрессни енгиллаштириш учун эркак билан қучоқлашиш хизматидан фойдаланганини айтди. “Мени қучоқлашганда ўзимни хавфсиз ва барқарор ҳис қиламан”, — деб таъкидлади у.
Қизиқ жиҳати шундаки, бу турдаги “қучоқ сеанслари” кўпинча жамоат жойларида — метро станциялари, савдо марказлари ёки парк ҳудудларида амалга оширилади. У ерда махсус “қучоқлаш мутахассислари” билан бевосита танишиш мумкин.
