Хонанда Зебойи Жаҳонни ўлдирган эркак 13 йилга қамалди
Жиноят ишлари бўйича Тойлоқ туман судининг 18 ноябрдаги ҳукмига кўра, марҳуманинг турмуш ўртоғи 13 йилга озодликдан маҳрум этилди. Жабрланувчининг қонуний вакили судланувчига тайинланган жазони умрбодга ўзгартиришни сўраб, судга апелляция шикояти киритди.
2025 йил 26 июль куни Зебойи Жаҳон тахаллуси билан ижод қилган Зебинисо Носирова қотиллик қурбони бўлган эди. Ўша пайтда марҳуманиниг онаси Zamon.uz мухбири билан суҳбатлашиб, қотиллик тафсилотлари, жазо масаласида ўз фикрларини билдирганди. Хусусан, у судланувчига камида 25 йил муддатга қамоқ жазоси тайинлаш кераклигини айтганди.
ЖИБ Тойлоқ суди судьяси X.Аминов раислигида ушбу жиноят иши кўриб чиқилиб, судланувчига 13 йил муддатга озодликдан маҳрум қилиш жазоси тайинланди. Бу муддатга норози бўлиб, жабрланувчининг қонуний вакили судга апелляция шикояти берди. Уни 16 декабрь куни Самарқанд вилоят суди жиноят ишлари бўйича судлов ҳайъати апелляция инстанцияси кўриб чиқиб ажрим қилди. Zamon.uz суд ҳужжатлари билан танишди.
Суд ҳукмига кўра, жабрланувчи тўй-томошаларда хонандалик қилиб, Инстаграмъдаги саҳифасига турли видеоларини жойлаштириб келган. Судланувчи эса уларни кўриб, рашк қилган ва нафрати ортавергач, турмуш ўртоғини қасддан ўлдиришни режа қилган. Шундан кейин у 2025 йил 26 июль куни марҳуманинг уйига - Тойлоқ туманига борган. Судланувчи аёлга фарзандларини Пайариқдаги уйига (оилавий келишмочилик сабаб алоҳида яшаб келган) олиб кетмоқчи эканлигини айтган.
Зебинисо Носирова эса буни рад қилиб, никоҳдан ажрашишини билдирган. Сўнг, ўртада жанжал чиққан. Судланувчи жабрланувчининг бўйнини қўли билан бўғган, елкаларига жароҳат етказган ҳамда унинг бошини девор ва эшикка урган. Оқибатда, аёлнинг бўйин умуртқаси синиб, ҳалок бўлган. Кейинчалик судланувчи уй ичида бўлган вояга етмаган фарзандини олиб, эшикни ташқаридан қулфлаган, у барча фарзандларини олиб воқеа жойидан яширинган.
Апелляция шикоятида, жабрланувчининг онаси невараси С.Г.нинг кўз олдида қотиллик қилинганини, судланувчига енгил жазо тайинланганини айтган. Шундан келиб чиқиб, вакил судланувчини ЖКнинг 97- моддаси 2-қисми «ж» банди билан айблаб, умрбод қамоқ жазоси беришни сўраган (биринчи инстанцияда ЖКнинг 97-моддаси 1-қисми билан айбланган).
Вояга етмаган С.Г. эса суддаги кўрсатмасида қотиллик куни акаси Юсуфхон билан ташқарида ўйнаб ўтиргани, отаси келиб онасини сўраб уйга кириб кетганлиги ва отасининг орқасидан кирмаганлигини айтди.
Қайд этилишича, С.Г. ота-онасининг жанжалини кўрмаган, уйига кириш учун бораётганда отаси укасини қўлига кўтариб уй эшигини ёпаётган бўлган. Шунда судланувчи С.Г. ва унинг укасини олиб воқеа жойидан кетган.
Самарқанд вилоят суди апелляция инстанцияси шу ва бошқа ҳужжатларни келтириб, шикоятни рад этди ҳамда тайинланган жазони ўзгаришсиз қолдирди.
Маълумот ўрнида, марҳума Зебойи Жаҳоннинг турмуш ўртоғига муқаддам Жиноят Кодексининг фирибгарлик моддаси билан 2 йилу 1 ой 18 кунга ахлоқ тузатиш ишлари жазоси тайинланган.
