АҚШнинг тинчлик режаси 28 банддан 20 бандга қисқартирилди — Зеленский
Украина президенти тинчлик режасидан “шубҳасиз, Украина тарафдори бўлмаган бандлар” олиб ташланганини, бироқ ҳудудий масала бўйича муросага ҳали эришилмаганини билдирди.
Украина Президенти Владимир Зеленский маълумотларига кўра, АҚШ томонидан таклиф этилган дастлабки 28 банддан иборат тинчлик режаси Украина томони билан қайта кўриб чиқилиб, 20 бандга қисқартирилди.
Зеленский журналистларга берган изоҳида, “28 банд бор эди, энди 20 та қолди — очиқдан-очиқ Украина манфаатларига зид бўлган, яъни ънон-Украинаʼ бандлари олиб ташланди” деб таъкидлади.
Шундай бўлсада, ҳудудий масалалар — яъни Россия босиб олган ҳудудлар, суверенитет ва ҳудудлар дахлсизлиги билан боғлиқ муаммолар бўйича ҳозиргача ҳеч қандай келишувга эришилмаган. “Ҳудудларни бериш бўйича муросага ҳозирча эришилмаган” — деди президент.
Журналистлар билан суҳбатда Зеленский Украина на конституция, на халқаро ҳуқуқ бўйича ўз ҳудудларидан воз кечишга ҳаққи йўқлигини таъкидлади.
Шунингдек, Зеленскийнинг маълумотига кўра, тинчлик режаси устида якуний келишув 9 декабрга қадар тайёр бўлиб, кейин АҚШга юборилиши режалаштирилган.
Ҳозирги паллада Украина ва унинг халқаро ҳамкорлари тинчлик режаси доирасида ҳудудий дахлсизлик, хавфсизлик кафолатлари ва халқаро кафолатлар масалаларини биринчи ўринга қўйган ҳолда музокараларни давом эттирмоқда.
