Зеленский майда Германияга бориши мумкин
У Германияда “Буюк Карл” мукофоти билан тақдирланади.
Украина Президенти Владимир Зеленский Россия билан уруш бошланганидан бери илк бор май ойида Германияга ташриф буюриши мумкин. Бу ҳақда «Корреспондент» нашри ёзмоқда.
Зеленский 14 май куни Германия ғарбидаги Ахен шаҳрида “Буюк Карл” мукофоти тақдимотида шахсан иштирок этиши кутиляпти. Бироқ президентнинг сафарига Украина Қуролли кучларининг эҳтимолий қарши ҳужуми халақит бериши ҳам истисно этилмайди.
Агар бу орада қарши ҳужум бошланса, Зеленский маросим иштирокчилари билан видеоҳавола орқали гаплашади.
Германия канцлери Олаф Шольц “Буюк Карл” мукофотининг тақдирлаш маросимида тантанали нутқ сўзлаши режалаштирилган. 2023 йили Зеленский ва Украина халқи Европани бирлаштиришга қўшган ҳиссаси учун унинг лауреатлари бўлди. Мукофот 18 май куни топширилиши керак эди, бироқ Шольц Япониядаги G7 саммитида иштирок этиши сабабли тақдирлаш маросими 13-14 майга кўчирилган.
