Украина президенти Владимир Зеленский АҚШ президенти Доналд Трамп томонидан илгари сурилган тинчлик ташаббусини тўғридан-тўғри рад этмасдан, уни Украина учун мақбул шаклда қайта кўриб чиқишга ҳаракат қилмоқда. Бу ҳақда The Wall Street Journal нашри хабар берди.
Нашрга кўра, Зеленский ўт очишни тўхтатиш шарти билан Украинада сайловлар ўтказишга тайёрлигини билдирган. Шунингдек, у Запорижжя атом электр станцияси масаласида муросага бориш мумкинлигини, бироқ объект Украина ва АҚШ назорати остида бўлиши лозимлигини таъкидлаган. Бундан ташқари, Украина армияси сонига чеклов қўйилиши мумкин, аммо у ҳозирги даражадан паст бўлмаслиги керак.
АҚШ томони Донбасснинг Украина назоратида қолаётган қисмини қуролсизлантирилган ёки эркин иқтисодий ҳудудга айлантиришни таклиф қилган. Бироқ Зеленский бу режада хавфсизлик кафолатлари етарли эмаслигини қайд этиб, агар Украина ҳудуддан қўшинларини олиб чиқса, Россия кучларининг қайта кириб келишига нима тўсқинлик қилиши масаласида Вашингтондан батафсил тушунтириш сўраган.