Мактаб битирувчилари учун якуний назорат имтиҳонларининг санаси аниқ бўлди
Жорий ўқув йили якунида 5-6-7-8 ҳамда 10-синфларнинг босқичли имтиҳонлари бўлмайди.
Мактаб битирувчилари учун якуний назорат имтиҳонларининг санаси маълум бўлди. Бу ҳақда Халқ таълим вазирлиги матбуот котиби Лайло Рустамова хабар берди.
ХТВ хабарига кўра,умумтаълим мактабларда 9- ва 11-синф ўқувчиларининг якуний назорат имтиҳонлари 26 майдан 15 июнга қадар ўтказилади.
Маълумотга кўра, 9- ва 11-синф- битирувчилари одатдагидек , қарорда белгиланган фанлардан имтиҳон топширадилар.
Шунингдек, байрам муносабати билан қўшимча дам олиш кунларини инобатга олган ҳолда умумий ўрта таълим муассасаларининг 9-синф ўқувчилари учун “Жисмоний тарбия” фанидан якуний назорат имтиҳонлари жорий йилнинг 2-7 май саналаридан 11-14 май кунларига кўчирилади.
Жорий ўқув йили якунида 5-6-7-8 ҳамда 10-синфларнинг босқичли имтиҳонлари бўлмайди.
Шунингдек, Давлат тест маркази томонидан бериладиган умумтаълим фанини билиш даражаси тўғрисида давлат сертификатга эга ҳамда чет тили фани бўйича В1 ва ундан юқори В2, С1, С2 даражадаги миллий ёки унга тенглаштирилган мос даражадаги халқаро тан олинган сертификатга эга бўлган ўқувчилар тегишли фандан ҳамда чет тили фанидан якуний назорат имтиҳонларидан озод этилади.
