Koronavirusga chalingan abituriyentlarning imtihonga kirishi ochiqlandi
2021/2022 o‘quv yili qabulida oliy taʼlim muassasalariga kirish test sinovlari yurtimizdagi epidemiologik vaziyatdan kelib chiqib, ochiq maydonlarda o‘tkaziladi.
Bu haqda Davlat test markazi xabar berdi.
Test sinovlari 5 avgust sanasidan boshlanadi. Imtihonlarni o‘tkazish uchun hududlarda stadion va xiyobonlar tanlab olingan bo‘lib, test sinovi o‘tkazilishidan oldin va tugaganidan keyin hudud to‘liq dizinfeksiya qilinadi. Abituriyentlar hududga kirishda ikki metrlik ijtimoiy masofaga amal qilishlari shart. Hududga kirishda barcha abituriyentlarning tana harorati o‘lchanib, antiseptik vositalar bilan qo‘llar tozalanadi. Hududga kirishda tana harorati 37 darajadan yuqori bo‘lgan hamda test sinovlari o‘tkaziladigan davrda koronavirus infeksiyasiga chalingan va davolanish muolajalarini olgan abituriyentlarga respublika bo‘yicha test sinovlari to‘liq yakunlangandan so‘ng qo‘shimcha imtihon tashkil etiladi.
Abituriyentlar test sinoviga shaxsiy pasporti yoki ID kartasi hamda abituriyent ruxsatnomasi bilan kelishi shart. Pasport nusxasi va boshqa hujjatlar bilan kelgan abituriyentlar test sinovlariga kiritilmaydi. Abituriyentlar test sinovi o‘tkaziladigan hududga telefon, kalkulyator, quloqchin, soat, lug‘at, “shpargalka” kabi vositalarni olib kelishi taʼqiqlanadi. Agar abituriyentda bu kabi narsalar aniqlansa, u imtihondan chetlashtiriladi. Test sinovlari ochiq maydonlarda o‘tkazilishidan kelib chiqqan holda, abituriyentlar imtihonga kepka, panama kabi bosh kiyimlarda kelishi mumkin. Videofiksatsiyadan o‘tganda shaxsi tasdiqlanmagan abituriyent barmoq izi skaneri orqali tekshiriladi. Unda ham shaxsi tasdiqlanmagan abituriyent Ichki ishlar xodimlar tomonidan o‘tkaziladigan surishtiruv natijasiga ko‘ra dalolatnoma asosida test sinovidan chetlashtiriladi. Abituriyentlar tekshiruvlardan o‘tkazilgach, ularga tibbiy niqob beriladi. Tibbiy niqob yangisiga almashtirilishi shart. Test sinovi o‘tkaziladigan maydonlarda har bir abituriyent uchun 3 metr kvadratdan kam bo‘lmagan joy ajratiladi va test sinovlari kunning salqin paytida ikki smenada o‘tkaziladi. Bunda birinchi smena 7:00 da, ikkinchi smena 19:00 da boshlanadi. Birinchi smenada qatnashadigan abituriyentlar 6:30 gacha, ikkinchi smenada esa 18:30 gacha hududga kirib, o‘z joyiga joylashgan bo‘lishi kerak. Belgilangan vaqtdan kechikib kelgan abituriyentlar test sinovlariga kiritilmaydi. Abituriyentlarga uchta majburiy, ikkita mutaxassislik fani bo‘yicha jami 70 ta test topshirig‘ini yechish uchun javoblar varaqasini to‘ldirish bilan birga uch soat vaqt ajratiladi. Blyutusstatsionar va 360 gradusga aylanuvchi videokuzatuv moslamalari bilan taʼminlanadi hamda test jarayoni test2021.uz sayti orqali onlayn translatsiya qilib boriladi.
Belgilangan tartib-qoidalarga to‘liq amal qiling! Unutmang, barchasi o‘z qo‘lingizda!
Eslatib o‘tamiz, avvalroq abituriyentlarga imtihonga kirishdan oldin eʼtibor berishi kerak bo‘lgan eslatmalar hamda test savollarining “X varianti” chiqqani haqida xabar berilgandi.
Bahriniso MADUMAROVA
