Shaxmat bo‘yicha xalqaro turnirda yetakchilar saralanmoqda

 

16-avgust kuni poytaxtimizdagi Xalqaro shaxmat akademiyasida start olgan xalqaro grossmeyster Georgiy Agzamov xotirasiga bag‘ishlangan o‘n to‘rtinchi anʼanaviy xalqaro musobaqada 3-tur o‘yinlari ortda qoldi. Bu haqda Turizm va sport vazirligi matbuot xizmati xabar berdi.

 

Eʼtiborlisi, dunyoning 12 ta davlatidan 150 nafar aql-idrok sohiblari qatnashayotgan ushbu musobaqaning «A» guruhida hozircha hamyurtimiz Nodirbek Abdusattorov mag‘lubiyatsiz odimlamoqda. Turnirning 1- raqamli ishtirokchisi  Abdusattorov 3-turda qora donalarda o‘ynaganiga qaramay belaruslik Kirill Spivakni mag‘lub etdi. Musobaqada g‘oliblikka asosiy daʼvogarlardan biri armanistonlik Shant Sargisyan ham hozircha 100 foizlik natija qayd etib turibdi.

 

U 3-turda ozarbayjonlik xalqaro grossmeyster Muradli Muhammad ustidan g‘alaba qozondi. Shuningdek, hozircha yana bir armanistonlik shaxmatchi Tigran Arutunyan hamda Eron  vakili Arian Golami ham 3 o‘yindan 3 ochko jamg‘argan holda yetakchilar safida bormoqda. Yosh, umidli shaxmatchimiz Humoyun Bekmurodovning 2,5 ochko bilan 5-8-o‘rinlardan joy olib turganligi tahsinga loyiq. Hamyurtlarimizdan Nodirbek Yoqubboyev hamda Bobir Sattorov ham xuddi shuncha ochko jamg‘argan.

Jamshid Amirov