Xalqaro shaxmat turniri yakuniy bosqichga yetdi
22 avgust kuni soat 15:30da Xalqaro shaxmat akademiyasida musobaqaning yopilish marosimi o‘tkaziladi. Bu haqda Turizm va sport vazirligi axborot xizmati xabar berdi.
16 avgust kuni poytaxtimizdagi Xalqaro shaxmat akademiyasida boshlangan shaxmat turniri ertaga o‘z poyoniga yetadi.
O‘zbekistonlik birinchi grossmeyster Georgiy Aʼzamov xotirasiga bag‘ishlab o‘tkazilayotgan XIV anʼanaviy xalqaro turnirda dunyoning 12 ta davlatidan jam bo‘lgan 150 nafar aql-idrok sohiblari g‘oliblik uchun dona surishmoqda.
Ortda qolgan 8-turdan keyin g‘oliblikka daʼvogar ikki nafar shaxmatchi ajralib qoldi. Bular – armanistonlik Shant Sargisyan hamda hamyurtimiz Nodirbek Yoqubboyevlardir.
7-tur yakunlariga ko‘ra 5,5 ochko bilan peshqadamlar safida kelayotgan hamda qo‘shimcha koeffitsiyentlarga ko‘ra birinchi pog‘onani egallab turgan yana bir vakilimiz Nodirbek Abdusattorov esa 8-turda oq donalarda o‘ynagan bo‘lishiga qaramay o‘z jamoadoshi Jahongir Vohidovga imkoniyatni boy berdi. Natijada Abdusattorov biryo‘la 4-o‘ringa tushib ketdi.
8-turda Sargisyan o‘z hamyurti Tigran Arutunyanni, Yoqubboyev esa qora donalarda o‘ynashiga qaramay eronlik Aryan Golamini mag‘lub etdi. Natijada Sarkisyan va Yoqubboyev o‘z ochkolari sonini 6,5 taga yetkazib olgan holda taʼqibchilaridan o‘zib ketishdi va so‘nggi tur oldidan aynan mana shu ikki sportchida musobaqa g‘olibi bo‘lish uchun juda yaxshi imkoniyat hosil bo‘lgan.
Abdusattorov ustidan qozonilgan g‘alaba esa Vohidovga 6 ochko bilan 3-o‘ringa ko‘tarilib olish imkonini berdi.
4-11-o‘rinlarda borayotgan shaxmatchilar esa bir xil – 5,5 tadan ochko jamg‘arishgan.
Avvalroq musobaqada yetakchilarning saralanayotgani haqida xabar bergan edik.
Jamshid Amirov
