“Surxon” klubi aʼzolari Javohir Esonqulovni urdi...(mi? )
Yaqinda ijtimoiy tarmoqlarga "Surxon" klubi sobiq futbolchisi Javohir Esonqulov o‘zining kaltaklangani yuzasidan tegishli organlarga murojaat qilgani to‘g‘risidagi videoni joylashtirdi.
Ushbu videoda futbolchini “Surxon” klubi aʼzolari kaltaklagani aytilgan. Voqeaga klub matbuot xizmati munosabat bildirdi.
Maʼlum bo‘lishicha, “Surxon” klubi va sobiq futbolchi Javohir Esonqulov o‘rtasida tuzilgan shartnoma 2021 yilning 21iyul kuni ikkala tomonning o‘zaro kelishuviga ko‘ra bekor qilingan va futbolchi klubdan hech qanday moliyaviy eʼtirozi yo‘qligi haqidagi rasmiy hujjatga qo‘l qo‘yib, tasdiqlab bergan. Sobiq futbolchi shartnoma bekor qilingan bo‘lsa-da, klub ofisiga kelib, qo‘shimcha pullar talab qila boshlagan. Sobiq futbolchilar Javohir Esonqulov va Akrom Xodjayev o‘zaro til biriktirib, klub ofisi eshigi yonida jamoa rahbari nomiga qo‘pol so‘zlar aytgan. Bu vaziyatdan xabar topgan jamoa sardori Asror G‘afurov vaziyatga oydinlik kiritish maqsadida har ikkala futbolchini klub ofisiga olib kelgan va ushbu so‘zlarni nega yozganligi bo‘yicha izoh so‘ragan. Futbolchilar esa buni ular yozmaganligini aytadi. Biroq ularning har bir harakati klub ofisida o‘rnatilgan kuzatuv kameralarida yozib olingan. Jamoa sardori Asror G‘afurov futbolchilarni tartibga chaqirgan vaqtida o‘lar o‘rtasida ziddiyat paydo bo‘lgan va ikkala futbolchi bir-biri bilan mushtlashib ketgan. Klub sport direktori A.Tairov va klub 1-vitse prezidenti A.Abdurahmonov har ikkala futbolchini ajratib, yarashtirib qo‘ygan. Shundan so‘ng sobiq futbolchilar J.Esonqulov va A.Xodjayev o‘z aybiga iqror bo‘lib, yozma ravishda uzr so‘ragan.
Eslatib o‘tamiz, avvalroq Toshkent viloyatining Bo‘stonliq tumanida «Sky Camp» sport festivaliga start berilgani haqida xabar bergan edik.
Jamshid Amirov
