“Tolibon” vakili doimiy hukumat tuzilishi haqidagi savolga aniq javob bera olmadi
“Tolibon” rasmiysi doimiy hukumat tuzilishi borasida berilgan savolga javob berdi. Bu haqda “Ria Novosti” xabar bergan.
Harakat rasmiy vakili Suhayl Shahin Yaponiyaning “NHK” telekanaliga bergan intervyusida doimiy hukumat masalasi ko‘tarilgan. Lekin Shahin uning qachon to‘liq tuzilishi masalasiga aniq javob bermagan.
“Vazirlar Mahkamasi tarkibining to‘liq tuzilishi uchun bir necha kun yoki bir necha oy kerak bo‘lishi mumkin. Uning tarkibida baʼzi o‘zgarishlar bo‘lishi mumkin”, — degan harakat vakili.
Shuningdek, u yangi hukumat inauguratsiyasi rejalashtirilgani, ammo keyinchalik bekor qilinganini maʼlum qildi. “Biz bu borada marosim o‘tkazishni rejalashtirgandik, lekin barcha vazirlar tayinlanishi maʼlum vaqt talab qilishini inobatga olib bekor qildik”, — deb taʼkidlagan.
Suhayl Shahin AQSH bilan munosabatlarga ham to‘xtalib o‘tdi. Uning so‘zlariga ko‘ra, toliblar Vashington bilan yangi bosqichdagi munosabatlarni o‘rnatishga tayyor.
Maʼlumot o‘rnida: 15 avgust kuni “Tolibon” harakati Kobulni egallagan. 31 avgustda AQSH Afg‘onistonni to‘liq tark etdi. Harakat tomonidan egallanmagan yagona hudud — Panjsher edi. Ammo 6 sentyabrda ushbu hudud ham “Tolibon” nazoratiga o‘tdi. Shundan keyin toliblar 7 sentyabr kuni mamlakatning yangi hukumati tuzilganini eʼlon qildi.
Eslatib o‘tamiz, bundan avval Afg‘onistonning Hilmand viloyati yangi gubernatori G‘arbni Afg‘onistonga investitsiyalar kiritishga chaqirgan edi.
Jahongir Qo‘ziyev
