“Tolibon”ning tan olinishi eng muhim masala emas – Pokiston TIV
Pokiston “Tolibon” hokmiyatini tan olishga shoshilmaydi. Bu haqda Pokiston TIV rahbari Shoh Mahmud Qurayshiy maʼlum qildi.
“Pokiston toliblarni tan olgani yo‘q. Biz vaziyat qay tarzda rivojlanishini kuzatamiz. Ular vaqtinchalik hukumat tuzilganini eʼlon qildi, lekin hozir bu bosqichda “Tolibon”ni hech kim tan olmaydi”, — degan Qurayshiy.
Pokiston tashqi ishlar vaziri toliblarning hozirda tan olinishi eng muhim masala emasligini aytgan. Uning fikricha, hozirda eng muhim masala –– gumanitar inqirozning oldini olish.
“Agar hech qanday harakat qilinmasa, gumanitr halokat yuz beradi. Pokiston uning oqibatlari bilan darhol to‘qnash keladi, ammo oxir-oqibatda G‘arb ham bunga tovon to‘laydi”, – deb ogohlantirgan Qurayshiy.
Maʼlumot o‘rnida: 15-avgust kuni “Tolibon” harakati Kobulni egallagan. 31-avgustda AQSH Afg‘onistonni to‘liq tark etdi. Harakat tomonidan egallanmagan yagona viloyat Panjsher edi. Ammo 6 sentyabrda ushbu hudud ham “Tolibon” nazoratiga o‘tdi. Shundan keyin toliblar 7-sentabr kuni mamlakatning yangi hukumati tuzilganini eʼlon qildi.
Bundan avval Eron Prezidenti Ibrohim Raisiy Eron va Tojikistonning Afg‘oniston bo‘yicha pozitsiyasi yaqin ekanini aytgan edi.
Jahongir Qo‘ziyev
