Bugun Toshkentda “tungi velosayr” o‘tkaziladi
Bugun, 22-sentabr – O‘zbekistonda “Avtomobilsiz kun” deb eʼlon qilindi.
Sana munosabati bilan Toshkentda “Tungi velosayr” tashkil etiladi. Sayr bugun, 22-sentabr kuni kech soat 20:00da boshlanadi. Mahtumquli va Mirzo Ulug‘bek ko‘chalaridan “Yangi O‘zbekiston” bog‘igacha bo‘lgan yo‘lda davom etadi. Veloharakat davoomida avtomobillar harakati to‘liq to‘xtatilmaydi. Tadbirda professionallar qatori ko‘ngillilar ham ishtirok etishlari mumkin.
Turizm va sport vaziri sana munosabati bilan davlat idoralari va mahalliy organlar rahbarlarini shaxsiy namuna ko‘rsatishga chorladi.
-“Xalqaro avtomobilsiz kun” munosabati bilan davlat idoralari va mahalliy organlari rahbarlarini shaxsiy namuna ko‘rsatib, 22 sentyabr “Xalqaro avtomobilsiz kun” tadbirlarida faol ishtirok etishga chaqiraman. Shu bilan birga, ilm-fan, madaniyat va sport sohalari xodimlari hamda OAV vakillarini, qolaversa barcha yurtdoshlarimizni shu kuni ommaviy tadbirlarda faol ishtirok etishga hamda bir kun davomida avtomobil o‘rniga velosipeddan foydalanish yoki piyoda harakatlanishga chorlab qolaman. Avtomobilsiz kun aksiyasi doirasida #carfreeday_uzbekistan, #shaxsiynamunakursat, #avtomobilsizbirkun xeshteglaridan foydalanib, yana-da keng aholini qamrab olishni taklif etaman. Zero bu kabi tadbirlarni o‘tkazish mamlakatimizda yo‘l xarakati xafsizligini yana-da takomillashtirish, shahar aholisi o‘rtasida ekologik madaniyat hamda sog‘lom turmush tarzini targ‘ib qilishni maqsad qilgan. Jahon sog‘liqni saqlash tashkiloti ham o‘z tavsiyalarida jismoniy faollikni oshirish infetsion, yurak-qon tomir, saraton va qandli diabet kasalliklar profilaktikasida muhim o‘rin tutishini taʼkidlaydi. Shunday ekan, fikrimcha, ayni damda dunyoda pandemiya bilan bog‘liq vaziyatda bunday aksiyaning o‘tkazilishi ayni muddaodir”, - deydi Bosh vazir o‘rinbosari – turizm va sport vaziri Aziz Abduhakimov.
Tashkilotchilarning maʼlum qilishicha, festival doirasida Toshkent shahrining tungi go‘zalligi, madaniy xususiyatlari keng targ‘ib qilinib, aholining turli qatlamlari ishtirokida velosayr, skeytlarda, samokatlarda va roliklarda uchish, shuningdek, mohir velosipedchilar tomonidan aholiga velomahorat darslarini namoyish etish o‘rin olgan.
Eslatib o‘tamiz, avvalroq Qoraqalpog‘istonlik yurtdoshimiz Beruniydan Toshkentgacha bo‘lgan masofani velosipedda bosib o‘tgani haqida xabar berilgandi.
