Metroda 13 yoshli qizga tegajog‘lik qilgan erkak bo‘yicha surishtiruv ishlari boshlandi
Toshkent metropolitenida 13 yoshli qizga behayo harakatlar qilgan erkak bo‘yicha surishtiruv boshlandi. Bu haqda IIV Transportda xavfsizlikni taʼminlash bosh boshqarmasi xabar bermoqda.
Qayd etilishicha, Toshkent metropolitenida voyaga yetmagan qizga nisbatan behayo harakatlar qilgan erkak bo‘yicha surishtiruv ishlari amalga oshirilmoqda. Ijtimoiy tarmoqlarda metro vagonida ketayotgan qizga nomaʼlum erkak tegajog‘liq qilishga uringani tasvirlangan video tarqaldi. Holatni qizning o‘zi telefoni yordamida tasvirga olgan.
IIV Transportda xavfsizlikni taʼminlash bosh boshqarmasining maʼlum qilishicha, holat 18-sentabr kuni soat taxminan 17:00 larda Toshkent metropolitenining “Olmazor” bekatida sodir bo‘lgan.
Toshkentning Yangihayot tumanida yashovchi 2008-yilda tug‘ilgan, voyaga yetmagan, A.E.ga nisbatan nomaʼlum erkak tomonidan behayo harakatlar qilgani holati bo‘yicha surishtiruv ishlari olib borilmoqda. Hozirda videokuzatuv moslamalari orqali nomaʼlum erkakning harakat yo‘nalishini o‘rganish va shaxsini aniqlash ishlari amalga oshirilmoqda.
“Hurmatli fuqarolar, agar siz ushbu fotosuratdagi erkak kishi haqida maʼlumotga ega bo‘lsangiz darhol 102 raqamiga yoki yaqin bo‘lgan ichki ishlar organiga xabar berishingizni so‘raymiz”, — deyiladi xabarda.
Eslatib o‘tamiz, avvalroq Farg‘onada 11 yoshli bola ikki yil davomida amakisi tomonidan zo‘rlab kelingani hamda qanday kimsalar pedofil bo‘lishi mumkinligi haqida xabar berilgandi.
Bahriniso Madumarova
