Chiroqchi tuman hokimligi qarshisidagi markaziy o‘yingoh qarovsiz ahvolga kelib qoldi
Qashqadaryo viloyati Chiroqchi tumani markazida, shundoq tuman hokimligi qarshisida joylashgan markaziy o‘yingoh qarovsiz tashlab qo‘yilgani sababli bugun xarob ahvolga kelib qolgan. Bu haqida “Nasafnews.uz” xabar qildi.
Maʼlumotga ko‘ra, bu o‘yingoh oxirgi marta 2005-yilda taʼmirlangan. Nazorat yo‘qligi tufayli o‘yingoh atrofini o‘t-o‘lan bosib ketgan. Bir qismi chiqindixonaga aylantirilgan. Stadion devorlariga esa “sevdim telbalarcha” qabilidagi dil izhorlari yozib tashlangan. O‘rindiqlar umuman foydalanib bo‘lmaydigan darajaga kelib qolgan.
Maʼlum bo‘lishicha, bu joy tumandagi bolalar va o‘smirlar sport maktabi balansida turadi. Maktab direktori hududni taʼmirlashga imkoniyat yo‘qligini aytgan bo‘lsa, tuman turizm va sport bo‘limi boshlig‘i lavozimga yaqinda kelganini ro‘kach qilmoqda.
Eslatib o‘tamiz, avvalroq “Nasaf” klubi OFK kubogida qancha pul ishlashi haqida xabar bergan edik.
Jamshidbek Amirov
