Muhammad Xorazmiy nomidagi xalqaro matematika markazi va jamg‘armasi tashkil etiladi
Urganch davlat universiteti qoshida Muhammad Xorazmiy nomidagi xalqaro matematika markazi va jamg‘armasini tashkil etiladi. Bu haqda O‘zbekiston Matbuot markazi O‘zbekiston Liberal-demokratik partiyasidan O‘zbekiston Respublikasi Prezidentligiga nomzod Shavkat Mirziyoyevning Xorazm viloyati saylovchilari bilan uchrashuvida so‘zlagan nutqiga asoslanib xabar berdi.
“Markaz matematika bo‘yicha iqtidorli yoshlarni tanlab olish va ilmga yo‘naltirish, ularning o‘z salohiyatini namoyon qilishiga ko‘mak berish bilan shug‘ullanadi. Bundan tashqari, Toshkent axborot texnologiyalari universitetining Urganch filiali uchun qo‘shimcha ming o‘rinli yangi o‘quv binosi quriladi. O‘zbekiston davlat xoreografiya akademiyasining Urganch filiali va uning qoshida Urganch boshlang‘ich raqs sanʼati maktab-internati tashkil etiladi”, — deya taʼkidlagan mamlakatimiz rahbari.
Uchrashuvda viloyatdagi oliygohlar uchun qo‘shimcha 3,5 ming o‘rinli 8 ta talabalar yotoqxonasi bunyod etilishi maʼlum qilindi.
Eslatib o‘tamiz, avvalroq Prezident maktabi bitiruvchilari davlat OTMlariga imtihonsiz grant asosida qabul qilinishi, Qashqadaryoda Al Xorazmiy maktabi ochilishi mumkinligi hamda Namanganlik qiz ham Prezident, ham Al Xorazmiy nomidagi maktab sinovidan o‘tgani haqida xabar berilgandi.
Olamgir Abdiyev
