Bu yil doktorantura imtihonlari an’anaviy tarzda o‘tkaziladi
Bu yilgi doktorantura imtihonlari onlayn emas, odatdagidek, an’anaviy tarzda bo‘lib o‘tadi. Bu haqda Innovasion rivojlanish vazirligi axborot xizmati rahbari Nazokat Abduqunduzova brifingda ma’lum qildi.
Mutaxassisning aytishicha, doktoranturaga kirish imtihonlari va suhbat jarayonlarini video kuzatuv shaklida (onlayn translyasiya tarzida) o‘tkazish choralari ko‘riladi.
Tayanch doktoranturaga kirish imtihonlari bo‘yicha topshiriladigan birinchi fan umumiy balining teng yarmidan, ya’ni 50 foizidan kam ball to‘plagan talabgorlar keyingi bosqichga o‘tkazilmaydi. Bu fan mustaxassislik yoki chet tiliga oid bo‘ladi.
Shuningdek, brifingda mavzuga oid savollarga javob berildi. Jumladan:
Bir tayanch doktorant o‘z yo‘nalishidan boshqa yo‘nalishga "perevod" qilishi mumkinmi?
Tayanch doktoranturaga kirish imtihonlaridagi savollar bir ixtisoslikdan boshqa ixtisoslikka to‘g‘ri kelmaganligi sababli ko‘chirish mumkin emas.
Mustaqil tadqiqotchi bo‘lgan izlanuvchi tayanch doktoranturaga o‘qishga topshirishi mumkinmi?
Normativ-huquqiy hujjatlarda mustaqil izlanuvchilikka rasmiylashtirilgan shaxs tayanch doktoranturaga hujjat topshirishi mumkin yoki mumkin emasligi to‘g‘risida normalar berilmagan. Shu sababli hujjat topshirishda mustaqil izlanuvchilikka rasmiylashtirilgan ilmiy yoki ta’lim tashkilotlarining ruxsatiga asosan topshirish maqsadga muvofiq.
Stajyor-tadqiqotchilikda o‘qiyman. Ilmiy maqolalarim va ishim deyarli tayyor bo‘lib qolgan. Doktoranturaga kirishga menda imtiyoz bormi?
Stajyor-tadqiqotchilik ishlab chiqarishdan ajralgan holda tegishli ixtisoslik bo‘yicha ilmiy va ilmiy-ijodiy izlanishlarni olib borish, shuningdek, falsafa doktori ilmiy darajasini olish uchun izlanuvchini tayyorlash shakli hisoblanib, ushbu shaklda o‘qigan shaxsga hech qanday imtiyoz berilmaydi.
Eslatib o‘tamiz, bundan avval “El-yurt umidi” jamg‘armasi 272 o‘rinli stipendiya tanlovini e’lon qilgani hamda Zangiota tumanida universitet ochilishi haqida xabar berilgandi.
Olamgir Abdiyev
