To‘rt nafar bokschimiz bugun jahon chempionati finalida ringga chiqadi
Moskva shahrida yakuniga yetib borayotgan boks bo‘yicha harbiylar o‘rtasidagi jahon chempionati hal qiluvchi pallaga kirdi. Bugun musobaqaning final janglari bo‘lib o‘tadi.
Bu haqda O‘zbekiston Olimpiya qo‘mitasining axborot xizmati maʼlum qildi.
Oltin medal uchun kechadigan bugungi bahslarda 4 nafar vakilimiz — Mavluda Mavlonova (-75 kg), Osiyo o‘yinlari finalchisi Shunqor Abdurasulov (-60 kg), Mujibillo Tursunov (-64 kg) va Lazizbek Mullajonov (+91 kg) ringga ko‘tariladi. Ushbu o‘yinlar Toshkent vaqti bilan quyidagi tartibda bo‘lib o‘tadi:
Mavluda Mavlonova – Viktoriya Kebikova (Belarus): (-75 kg, 18:00 dan so‘ng)
Shunqor Abdurasulov – Konstantin Opolskiy (Rossiya): (-60 kg, 19:20 dan so‘ng)
Mujibillo Tursunov – Dmitriy Asanov (Belarus): (-64 kg, 19:35 dan so‘ng)
Lazizbek Mullojonov – Svetoslav Teterin (Rossiya): (+91 kg, 21:15 dan so‘ng).
Eslatib o‘tamiz, bundan avval Xalqaro boks federatsiyasi (AIBA) shu yilning oktyabr oyida o‘tkaziladigan kattalar o‘rtasidagi jahon chempionatining mukofot jamg‘armasini eʼlon qilgani haqida xabar berilgandi.
