“16 fevral voqealari"ni uyushtirgan xavfli shaxs 23 yildan so‘ng ushlandi
Davlat xavfsizlik xizmati xodimlarining saʼy-harakati bilan "Turkiston islom harakati" (“TIH”) xalqaro terroristik tashkiloti aʼzosi, O‘zbekiston Respublikasi hududida o‘ta og‘ir jinoyatlar sodir etganligi sababli 23 yildan buyon qidiruvda bo‘lgan “Yu.J.” xorijda ushlanib, mamlakatimizga olib kelindi.
DXX matbuot xizmatining xabar berishicha, 1969-yil Toshkent viloyatida tug‘ilgan ushbu shaxs 1998-yilning boshlarida Rossiyaning Checheniston Respublikasiga borib, iordaniyalik Amir Xattob tomonidan tashkil qilingan jangarilar lagerida maxsus tayyorgarlikdan o‘tadi va o‘sha yilning oxirlarida Afg‘onistondagi “TIH” xalqaro terroristik tashkiloti safiga qo‘shiladi.
Maʼlum qiliniicha, 1999-yilning yanvar oyida tashkilot yetakchilarining ko‘rsatmasi bilan u aylanma yo‘llar orqali Toshkent shahriga kelib, badavlat odamlarning uylarida bosqinchiliklarni amalga oshiradi hamda ularning pul va qimmatbaho buyumlarini o‘zlashtirib, Afg‘onistondagi “TIH” yetakchilariga yuboradi.
Qayd etilishicha, ushbu shaxs 1999-yilning 16-fevral va 30-mart kunlari Toshkent shahrida amalga oshirilgan qo‘poruvchilik harakatlarida ham ishtirok etadi. Shuningdek, 1998-2006 yillarda xorijiy davlatlardagi xalqaro terroristik tashkilotlar safida jangovar harakatlarda qatnashadi.
Hozirda unga nisbatan qo‘zg‘atilgan jinoyat ishi doirasida tergov harakatlari olib borilmoqda.
Avvalroq O‘zbekistonda o‘tgan olti oy mobaynida sodir etilgan jinoyatlar soni 111,9 foizga oshgani, “16 fevral voqealari” bo‘yicha sudlangan 5 kishi oqlangani, Toshkentda o‘ta og‘ir jinoyat sodir etganlikda gumonlanayotgan shaxs qidirilayotgani hamda O‘zbekistondagi farmatsevtika kompaniyalaridan birining bosh direktori Sankt-Peterburgda qo‘lga olingani haqida xabar berilgandi.
