Қайд этилишича, 24 июль куни жиноят ишлари бўйича Тошкент вилояти судида 1999 йил 16 февраль воқеаларига алоқадорлиги юзасидан судланган 5 нафар шахсга оқлов ҳукми эълон қилинган.
Маълумотларга кўра, оқланган 5 нафар фуқарога 1999 йилда 3 йилга озодликдан маҳрум этиш жазоси белгиланган бўлган. 1999 йилда ўтган суд ҳукмидан норози бўлган 5 нафар шахс орадан 22 йил ўтиб, судга аппеляция шикояти билан мурожаат қилганлар.
22 йил аввал уларга Жиноят кодексининг 208-моддаси яъни Ҳокимият ҳаракатсизлиги, яъни давлат органи мансабдор шахсининг ўз хизмат вазифаси юзасидан бажариши лозим ёки мумкин бўлган ҳаракатларни қасддан бажармаслиги бўйича айблов қўйилган.
Шунингдек, улар 1999 йилда Ўзбекистон Республикаси Президентининг “9-Майни Хотира ва қадрлаш куни” деб эълон қилиниши муносабати билан амнистия фармонини 2-моддаси татбиқ этилиб, тайинланган жазони ўташдан озод қилинган.
Эслатиб ўтамиз, 1999 йил, 16 февраль куни Тошкентнинг беш жойида портлашлар юз берган. 10:45 дақиқа ўтганда Вазирлар Маҳкамаси биноси олдида бомба ўрнатилган машина портлаган. Шу куни 1998 йил якунларига бағишланган йиғилиш бўлиши керак эди. Расмийларга кўра, портлаш Президент Каримов келишига 10 дақиқа қолганда содир бўлган. 16 киши ҳалок бўлган, 100 дан ортиқ одам жароҳатланган. Портлашлар теракт ва Президент Каримовга суиқасд деб эълон қилинган.
Шу куни пойтахт Тошкентнинг турли ҳудудларида, жумладан Мустақиллик майдони, Ички ишлар вазирлиги ва Миллий банк бинолари ёнида 6 та кучли портлашлар юз берган. Уларда 16 нафар киши қурбон бўлган, 100 дан ортиқ одам жароҳатланган.