"Yangi O‘zbekiston" savdo belgisi bilan alkogol mahsulot ishlab chiqarilarkan. Bu qanchalik to‘g‘ri?
“Sport.uz” saytida “Elsun-Sharob” kompaniyasi alkogol ichimlik chiqarish uchun "Yangi O‘zbekiston" savdo belgisini ro‘yxatdan o‘tkazishga ariza bergani haqida xabar tarqaldi.
Ochig‘i, ushbu xabar bir meni emas, ko‘pchilikni taajjubga solgan bo‘lishi, shubhasiz. Chunki gap oddiy joy yoki jism nomi emas, “Yangi O‘zbekiston” iborasi haqida ketmoqda. Qolaversa, “Yangi O‘zbekiston” oddiy ibora emas. Balki Prezident tashabbusi bilan hayotga tadbiq etilayotgan mamlakatimiz saʼy-harakatlarining asosiy g‘oyasi, ulkan maqsadlarimiz, biz niyat qilgan Uchinchi Renessans poydevori va unga eltuvchi ulug‘ yo‘l hamdir. Endi tasavvur qiling: shu nomni spirtli ichimliklarga qo‘yish yoki berish naqadar to‘g‘ri? Qaysi mantiqqa mos keladi? Shunday moʻtabar nomning “Bizga “Yangi O‘zbekiston”dan ikkita!”, “Yangi O‘zbekiston”dan qolmadimi?”, “Yangi O‘zbekiston”dan quy!” va hokazo tarzida talqin qilinishi quloqqa g‘alati eshitilmaydimi?
Faraz qiling, ertaga mazkur nomdagi alkogol mahsulotlari chiqarilsa, kelajagimizni qurishda tayanch nuqta bo‘lib turgan “Yangi O‘zbekiston” nomiga putur yetmaydimi? Tadbirkor ishsizlarni ish bilan taminlashni maqsad qilgani, yurt ravnaqiga o‘z hissasini qo‘shmoqchi bo‘gani, albatta, yaxshi. Ammo mahsulotni boshqacha nom bilan ham atasa bo‘ladi-ku?
Аvvalroq spirtli ichimlik ichish saratonga olib kelishi hamda "Coca-Сola Uzbekistan" davlat ulushini "Coсa-Cola İçyecek" sotib olishi haqida xabar berilgandi.
Olamgir Abdiyev
