Jahon iqtisodiyoti va diplomatiya universitetida to‘lov-kontrakt miqdoriga doir hujjat loyihasi ishlab chiqiladi
Jahon iqtisodiyoti va diplomatiya universitetida bakalavr va magistr darajalari uchun taʼlim olayotgan hamda shartnoma asosida o‘qishga kirgan talabalarga to‘lov-kontrakt miqdorini aniq belgilovchi normativ-huquqiy hujjat loyihasi ishlab chiqiladi.
Bu haqda Prezidentning “Normativ-huquqiy hujjatlar va ularning loyihalarini korrupsiyaga qarshi ekspertizadan o‘tkazishni yana-da takomillashtirish chora-tadbirlari to‘g‘risida”gi qarori loyihasi bilan tasdiqlanadigan “Yo‘l xaritasi”da belgilandi.
Unga ko‘ra, Oliy va o‘rta maxsus taʼlim hamda Tashqi ishlar vazirliklari 2021 yil 1 noyabrga qadar Oliy taʼlim muassasalarida talabalarga to‘lanadigan stipendiyalar miqdorlarini belgilash, tayinlash va to‘lashda qonuniylik, ochiqlik va shaffoflikni taʼminlash maqsadida tegishli normativ-huquqiy hujjat loyihasini ishlab chiqadi.
Mazkur loyihada Tashqi ishlar vazirligi tomonidan Jahon iqtisodiyoti va diplomatiya universitetida to‘lov-kontrakt asosidagi bakalavriatda taʼlim olishning qiymati bazaviy hisoblash miqdorining 80 baravaridan, magistraturada taʼlim olishning qiymati bazaviy hisoblash miqdorining 90 baravaridan oshmaydigan miqdorda belgilanishi qayd etib qo‘yiladi.
Avvalroq 2021-2022 o‘quv yili uchun to‘lov kontrakt miqdori eʼlon qilingani hamda talabalar kontrakt pulini QR kodli to‘lov shartnomalari orqali to‘lashi haqida xabar berilgandi.
Cho‘lponoy Ahmedova
