Surxondaryoda 13 ming dollar evaziga issiqxona qurib berishni vaʼda qilgan shaxslarga jinoyat ishi qo‘zg‘atildi
Surxondaryo viloyati Uzun tumanida issiqxona qurib berishni vaʼda qilgan shaxslarga jinoyat ishi qo‘zg‘atildi. Bu haqda viloyat IIB axborot xizmati xabar bermoqda.
Maʼlum bo‘lishicha, Andijon viloyatida yashovchi X.J. va X.Sh. 2021-yil ikki nafar Afg‘oniston fuqarosi va bir nafar surxondaryolik shaxsga issiqxona qurib berishini aytib, pullarini olgan va o‘zlashtirib ketgan.
Jumladan, 2021-yil mart oyida, X.J. va X.Sh. Sariosiyo tumaniga kelib, Afg‘oniston fuqarosi, hozirda Uzun tumani Nurbuloq mahallasida vaqtincha yashovchi, F.Sh.ning ishonchiga kirgan. So‘ng F.Sh.ga yashayotgan mahallasidan 60 sotix yer maydoniga issiqxona qurib berishini aytib, undan 13 ming dollar olgan va o‘zlashtirib ketgan.
Shuningdek, X.J. va X.Sh. joriy yil 19-mart kuni Uzun tumani "Kichik jonchekka" mahallasida yashovchi Ch.Ch.ga issiqxona qurib berishini aytib, 226 million 575 ming so‘m olgan.
Bundan tashqari, joriy yilning 23-iyun kuni Afg‘oniston fuqarosi, hozirda Uzun tumanida vaqtincha yashovchi, F.M.ga issiqxona qurib berishini aytib, 30 million so‘m o‘margan.
Taʼkidlanishicha, joriy yil 4-oktabr kuni X.J. va X.Sh.ga nisbatan Jinoyat kodeksining 168-moddasi 4-qismi “a” bandi bilan jinoyat ishi qo‘zg‘atilgan.
Avvalroq Xivada tadbirkorga to‘lov talabnomani yo‘qotishni vaʼda qilgan firibgar ushlangani, Bo‘stonliq tumanida 5 gektar yerni 150 ming AQSH dollarga olib berishni vaʼda qilgan shaxs qo‘lga olingani hamda DXX tomonidan noqonuniy yer sotish holatlarining oldi olingani haqida xabar berilgandi.
