AQSH tashqi siyosatida O‘zbekistonning ahamiyati ortib bormoqda – Politico
O‘zbekiston AQSH rasmiylari bilan yaxshi aloqalar o‘rnatishga harakat qilmoqda va bu amalda o‘z natijasini beryapti. Bu haqda Politico nashri maʼlum qildi.
Hozirda O‘zbekiston — AQSH munosabatlari kun tartibidagi eng birinchi masala Vashingtonning Afg‘oniston bilan chegarada antiterror kuchlarini joylashtirishi bo‘lib qolmoqda. Bu orqali AQSH Afg‘onistonni doimiy ravishda kuzatib borishi mumkin. Bayden Adminstratsiyasi bir necha oydan buyon Toshkent va mintaqaning boshqa davlatlari bilan bu borada muzokara olib bormoqda, lekin hali aniq natijaga erishilgani yo‘q. Oktabr oyida Pentagon rasmiylari O‘zbekistonga kelgan AQSH delegatsiyasi tarkibida xavfsizlik sohasida hamkorlik yuzasidan muzokaralarda ishtirok etgan. Bu haqda Politico'ga mudofaa vazirligi rasmiy vakili Lara Seligman maʼlum qilgan.
Oktyabr boshlarida AQSH respublikachilar partiyasidan bo‘lgan to‘rt kongressmen O‘zbekistonga tashrif buyurdi. Mamlakatga tashrifidan so‘ng delegatsiya aʼzolaridan biri, AQSH Kongressi vakillar palatasi qurolli kuchlar bo‘yicha qo‘mita aʼzosi Don Bekon “NatSec Daily”ga bergan intervyusida O‘zbekiston Prezidenti unda kuchli taassurot qoldirganini aytib o‘tdi. Bekonning fikricha, O‘zbekiston inson huquqlarining haqiqiy himoyachisiga aylanadi. “Menimcha, ular islohotlar yo‘lida jadal qadam tashlayapti”, — degan siyosatchi.
AQSH rasmiylarining so‘zlariga ko‘ra, Vashingtonning Afg‘onistondan chiqib ketganidan so‘ng O‘zbekistonning ahamiyati yana-da oshdi. Politico Toshkentni kelajakda AQSHga mintaqada yordam berishga qodir noyob imkoniyatlarga ega kuch sifatida ko‘rmoqda. Vakillik palatasining tashqi siyosat bo‘yicha qo‘mitasi aʼzosi Avgust Pflyugerning fikricha, Afg‘onistonning xalqaro terrorchilar uchun boshpanaga aylanishi mumkin bo‘lgan bir sharoitda mintaqada Vashingtonga do‘st mamlakatning mavjudligi ham taktik, ham strategik ahamiyatga ega.
Shuningdek, kongressmenlar O‘zbekiston diplomatiyasi yutuqlariga ham to‘xtalgan. “Men ko‘rgan elchixonalar ichida eng faol ishlaydigani O‘zbekiston elchixonasi”, – degan Don Bekon. Xampti-Dampti instituti direktori Jozef Merante “O‘zbekiston elchixonasi – biz ishlagan eng professional va faol elchixonalardan biri”, – deya fikr bildirgan. Bundan tashqari, Don Bekon o‘zi vakil bo‘lgan Nebraska shtatida O‘zbekiston delegatsiyasini qabul qilish ustida ishlashini maʼlum qilgan. U o‘zbek tomoni bilan qishloq xo‘jaligi va boshqa masalalarda hamkorlikni muhokama qilmoqchi. Shuningdek, Bekon AQSH va O‘zbekiston o‘rtasidagi savdo to‘siqlarini olib tashlashga harakat qilishini bildirgan.
“Umuman olganda, O‘zbekistonning tashqi siyosat ustida tinimsiz ishlashi Vashington oldida uning imidji yaxshilanishiga olib keldi”, — deb xulosa qiladi Politico.
Bundan avval O‘zbekiston mudofaa vazirligi mamlakatga AQSH harbiylari joylashtirilmasligini hamda Shavkat Mirziyoyev AQSH kongressmenlarini qabul qilgani haqida xabar berilgandi.
Jahongir Qo'ziyev
