Sud qarori yoki YPX xodimi ishtirokisiz sug‘urta tovoni olish tartibi maʼlum qilindi
Bugun, 19-oktabr kuni AOKAda “O‘zagrosug‘urta” AJ axborot xizmati rahbari Shuhrat Qobilov ishtirokida brifing bo‘lib o‘tdi. Unda majburiy avtosug‘urta bo‘yicha sud qarori yoki YPX xodimi ishtirokisiz sug‘urta tovoni olish tartibi bo‘yicha maʼlumot berildi.
Qayd etilishicha, yo‘l-transport hodisasi sodir bo‘lganda ishtirokchilar huquqni muxofaza qiluvchi organ xodimi ishtirokisiz xabarnoma to‘ldirib tibbiy narkologik tekshiruvdan o‘tadi. Shuningdek, transport vositalarini texnik shikastini baholash ekspertizasidan o‘tkazib, 3 kun ichida sug‘urtalovchiga ariza taqdim etadi.
Taʼkidlanishicha, sug‘urtalovchi hujjatlarni o‘rganib, 15 kun ichida tovon to‘lash yoki rad etish to‘g‘risida qaror qabul qiladi.
Maʼlumot uchun: "Transport vositalari egalarining fuqarolik javobgarligini majburiy sug‘urta qilish to‘g‘risida"gi qonunning 3-moddasi "yo‘l-transport hodisasi to‘g‘risidagi xabarnoma" tushunchasi bilan to‘ldirildi.
Bu sodir etilgan yo‘l-transport hodisasi haqida sug‘urtalovchiga xabar berish uchun yo‘l-transport hodisasi sodir etilgan joyda yo‘l-transport hodisasida ishtirok etgan haydovchilar tomonidan ixtiyoriy ravishda to‘ldiriladigan, transport vositalari egalarining fuqarolik javobgarligi vujudga kelganligi faktini tasdiqlovchi hujjatdir.
Eslatib o‘tamiz, qonunchilik palatasining navbatdagi yig‘ilishida “Maʼmuriy javobgarlik to‘g‘risidagi kodeksiga o‘zgartish va qo‘shimchalar kiritish haqida”gi qonun loyihasi ikkinchi o‘qishda ko‘rib chiqilgan edi.
Avvalroq sug‘urta polisini olmaganlik uchun jarima ikki baravarga kamaytirilishi, hukumat qarori bilan transport vositalari egalarining fuqarolik javobgarligini majburiy sug‘urta qilish qoidalariga o‘zgartirish va qo‘shimchalar kiritilgani, Oliy Majlis Senatining o‘n sakkizinchi yalpi majlisida “Sug‘urta faoliyati to‘g‘risida”gi qonun muhokama qilingani hamda O‘zbekistonda “prava”siz mashina haydashga va rulda telefondan foydalanishga ruxsat berilishi mumkinligi haqida xabar berilgandi.
