Aziz Abduhakimov Glazgodagi iqlim masalalari bo‘yicha xalqaro sammitda ishtirok etdi
Turizm va sport vaziri iqlim o‘zgarishi zamonaviy dunyoning asosiy tahdidlaridan biri ekanini taʼkidladi.
BMTning Glazgodagi iqlim masalalari bo‘yicha xalqaro sammitida O‘zbekiston Respublikasi turizm va sport vaziri Aziz Abduhakimov nutq so‘zladi. Bu haqda “Dunyo” axborot agentligi xabar berdi.
Abduhakimov o‘z chiqishida iqlim o‘zgarishi – zamonaviy dunyoning asosiy tahdidlaridan biri ekanini taʼkidlab o‘tdi. Shuningdek, Orol dengizi qurishi oqibatida Markaziy Osiyoda iqlim o‘zgarishi dunyodagi o‘rtacha ko‘rsatkichdan ikki barobarga tezroq yuz berayotgani alohida qayd etildi.
Vazir O‘zbekistonda “yashil” iqtisodiyotga o‘tishda kompleks Strategiya amalga oshirilayotganini maʼlum qilgan. Shu bilan birga har yili, xususan, 2021 yilda 200 million daraxt ko‘chati ekilishi haqida maʼlumot berilgan.
Abduhakimovning so‘zlariga ko‘ra, 2030 yilda O‘zbekiston iqtisodiyotida energetika samaradorligi ikki barobar oshirilib, unda qayta tiklanuvchi energiya ulushi 25 foizni tashkil etadi. Shuningdek, u Respublika Parij kelishuvi doirasida issiqxona gazlarining atmosferaga chiqarilishini kamaytirish maqsadida qo‘shimcha majburiyatlar olganini maʼlum qilgan.
Avvalroq olimlar global iqlim isishi tufayli Yerda hayot chidab bo‘lmas darajaga yetishidan ogohlantirgandi.
Jahongir Qo'ziyev
