Genom bo‘yicha davlat ro‘yxatiga olish tartibi belgilandi
Genom bo‘yicha davlat ro‘yxati IIVning Ekspert-kriminalistika bosh markazi tomonidan yuritiladi.
Maʼlumot uchun: Genom organizmni qurish va saqlash uchun zarur bo‘lgan biologik maʼlumotlarni o‘z ichiga oladi. Ko‘pgina genomlar, shu jumladan inson genomi va boshqa barcha hujayrali hayot shakllarining genomlari DNK tahliliga ega.
Genom bo‘yicha davlat ro‘yxatiga olish – biologik materialdan foydalanish, odamning shaxsini, tanib olinmagan murdani aniqlash uchun genomga oid axborotga ishlov berish bilan bog‘liq faoliyat.
Genom bo‘yicha majburiy ro‘yxatga olinadigan tafsilotlar mavjud. Bular:
▪️ og‘ir va o‘ta og‘ir jinoyat, jinsiy erkinlikka qarshi jinoyat, 16 yoshga to‘lmaganlar bilan jinsiy aloqa qilish va ularga uyatsiz harakatlar qilish bilan bog‘liq jinoyat sodir qilganlar;
▪️ og‘ir va o‘ta og‘ir jinoyat sodir etishda gumon qilinuvchi yoki ayblanuvchi tariqasida jalb qilinganlar;
▪️ tergovga qadar tekshiruv, surishtiruv va dastlabki tergov jarayonida biologik material olingani aniqlanmagan shaxslar;
▪️ tanib olinmagan murdalar.
Jazoni ijro etish muassasalari va probatsiya xizmati bu bo‘yicha majburiy ro‘yxatga olinadigan shaxslar ro‘yxatini shakllantiradi. Bundan tashqari, genom bo‘yicha ixtiyoriy ravishda davlat ro‘yxatiga olish fuqarolarning yozma arizasiga ko‘ra pullik asosda amalga oshiriladi.
Eslatib o‘tamiz, avvalroq gologramma bilan muloqot qilish imkonini beruvchi qurilma yaratilgani hamda huquqbuzarlik sodir etgan shaxs yetkazilgan zararni qoplab, jabrlanuvchi bilan yarashsa, javobgarlikdan ozod etilishi mumkinligi haqida xabar berilgandi.
Cho‘lponoy Ahmedova
