Andijonda bloger ayol kaltaklandi
IIB tomonidan tergovga qadar tekshiruv harakatlari olib borilmoqda.
Ijtimoiy tarmoqlarda tuman elektr tarmoqlaridan fermerlarga sunʼiy ravishda yozilgan qarz bo‘yicha hujjat so‘ragan bloger Fatima Jo‘rayeva bosh hisobchi tomonidan kaltaklangani aytilgan xabar tarqaldi. Bu haqda blogerning o‘zi ham videomurojaat bilan chiqdi.
O‘zbekiston Respublikasi Bosh prokurorining matbuot kotibi Hayot Shamsutdinov holatga munosabat bildirdi.
Aniqlanishicha, bloger Fatima Jo‘rayeva Ulug‘nor tumani IIBga 22 noyabr kuni murojaat qilgan. U o‘z murojaatida tuman elektr tarmoqlari korxonasi bosh hisobchisidan o‘zi huquqshunos sifatida ishlab kelayotgan fermer xo‘jaligiga elektr energiyasidan qarzdorlikni sunʼiy ravishda oshirilganligi bo‘yicha tegishli hujjatlarni berishini talab qilganligini bildirgan. Shunda korxona bosh hisobchisi unga qo‘pol munosabatda bo‘lgani, unga qo‘l ko‘tarib uyali qo‘l telefonini sindirib tashalganini bildirgan. Qilmishi uchun korxona xodimlariga nisbatan qonuniy chora ko‘rishlikni so‘ragan.
Hayot Shamsutdinovning so‘zlariga ko‘ra, tekshiruv harakatlari Bosh prokuratura tomonidan nazoratga olingan.
Hozirda mazkur murojaat bo‘yicha tuman IIB tomonidan tergovga qadar tekshiruv harakatlari olib borilmoqda. F.Jo‘rayevaning olgan tan jarohatlarini og‘irlik darajasini aniqlash maqsadida sud-tibbiy ekspertizasi tayinlangan.
Avvalroq Qashqadaryoda bank xodimlari mijozlar tomonidan kaltaklangani hamda Misrda bloger qiz qamalgani haqida xabar berilgandi.
Munojat Valiyeva
