Qo‘qonlik ota ikki farzandi uchun aliment o‘rniga xonadon va “Nexia” avtomashinasini berdi
Qarzdor otaga nisbatan qo‘zg‘atilgan ijro ishi tugatildi.
Qo‘qon shahrida voyaga yetmagan farzandini moddiy va maʼnaviy tomondan taʼminlashni yoddan chiqargan ota (Sh.U.) anchadan beri farzandlari uchun aliment pullarini o‘z vaqtida to‘lamay yurgani maʼlum bo‘ldi.
MIBning Qo‘qon shahar bo‘limiga qarzdor otadan undiruvchi M.U. foydasiga ikki nafar voyaga yetmagan farzandining moddiy taʼminoti uchun aliment undirish haqidagi ijro hujjati kelib tushdi .
Qarzdorga nisbatan qo‘zg‘atilgan ijro ishi yuzasida MIB xodimlarining saʼyi harakatlari bilan Sh.U. farzandlari voyaga yetguniga qadar to‘lanadigan aliment pullari evaziga Qo‘qon shahrida joylashgan uy va “Nexia” avtomashinasini sobiq turmush o‘rtog‘ining nomiga o‘tkazib berdi.
Kelishuv bitimi fuqarolik ishlari bo‘yicha Qo‘qon tumanlararo sudi tomonidan tasdiqlanib, qarzdorga nisbatan qo‘zg‘atilgan ijro ishi tamomlandi.
Avvalroq, Samarqandda aliment to‘lamagan qarzdor otaning barcha mol-mulklariga taqiq qo‘yilgani hamda farzandi uchun salkam 370 million so‘m aliment to‘lagan ota haqida xabar berilgandi.
Munojat Valiyeva
