Самарқандда алимент тўламаган қарздор отанинг барча мол-мулкларига тақиқ қўйилди
У фарзандлари учун 93 миллион сўм тўлади.
Самарқанд вилояти Тойлоқ туманида яшовчи фуқаро узоқ вақт фарзандлари учун ўз вақтида алимент тўламаган. Бу ҳақда МИБ вилоят бошқармаси хабар берди.
Фуқаролик ишлари Тайлоқ туманлараро судининг қарорига асосан қарздор О.И.дан ундирувчи Д.И.га икки нафар фарзандининг таъминоти учун даромаднинг иккидан бир қисми миқдорида алимент ундириш белгиланган.
Қарздорнинг мол-мулкларини аниқлаш мақсадида “Суд ҳужжатлари ва бошқа органлар ҳужжатларини ижро этиш тўғрисида”ги Қонуннинг 21, 87-моддаларига асосан тегишли ташкилотларга сўровномалар юборилган. Олинган маълумотларга асосан қарздор отанинг барча мол-мулкларига тақиқ қўйилган.
Бундан ўзига тўғри хулоса чиқарган қарздор ота шу куни фарзандларининг таъминотини ўйлаб, 93 миллион 300 минг сўм алимент пулларини тўлаб берган.
Аввалроқ, қарздор ота алимент тўлови ўрнига фарзандларига уй бергани ҳамда 5 нафар болага алимент тўлашдан бош тортган отага нисбатан жиноят иши очилгани ҳақида хабар берилганди.
Муножат Валиева
