Uch yil ichida maktablarda yangi 474,5 ming o‘quvchi o‘rni yaratildi

 

2018-2021 yillar davomida yurtimizda maktablarning moddiy-texnika bazasi va infratuzilmasini yaxshilash borasida olib borilgan saʼy-harakatlar natijasida maktablarida qo‘shimcha yangi 474,5 ming o‘quvchi o‘rinlari yaratildi.

 

Bu haqda AOKAda bo‘lib o‘tgan brifingda Xalq taʼlimi vazirligi axborot xizmati rahbari Laylo Rustamova maʼlumot berdi. 

 

Shundan 58,7 ming o‘quvchi o‘rni yangidan barpo etilgan 156 ta maktabda hamda navbatlilik koeffitsenti yuqori bo‘lgan 1511 ta umumtaʼlim maktablariga qo‘shimcha o‘quv binolari barpo etilishi natijasida 371,4 ming o‘quvchi o‘rni yaratilishiga erishildi.

 

Yuqorida tilgan olingan qariyb yarim million o‘quvchi o‘rnini yaratishga davlat byudjeti mablag‘lari hisobidan 5 trln.so‘mdan ortiq mablag‘ ajratilgan.

 

Shuningdek, maktablar 11 yillik taʼlim tizimiga o‘tishi munosabati bilan bo‘shab qolgan 383 ta kasb-hunar kollejlari maktablarga aylantirilishi hisobidan 221 ming qo‘shimcha o‘quvchi o‘rni yaratildi. Ushbu yangi o‘quv o‘rinlarining yaratilishi navbatlilik koeffitsenti oshib ketgan maktablardagi holatni meʼyor darajasiga olib tushishga va taʼlim olishga munosib shart-sharoitlar yaratishga xizmat qilgan.

 

Hukumat tomonidan tasdiqlangan tegishli hujjatga ko‘ra, 2022 yilda Respublika bo‘yicha jami 306 ta umumtaʼlim maktablarida, shundan 15 176 o‘quvchi o‘rniga mo‘ljallangan 37 ta maktablarni yangidan qurish, 71 819 o‘quvchi o‘rniga mo‘ljallangan 180 ta maktabni rekonstruksiya qilish va mavjud 89 tasini mukammal taʼmirlanishi belgilangan edi.

 

Hukumatning tegishli topshirig‘iga ko‘ra, hududlardagi holatni manzilli o‘rganish maqsadida turli vazirlik va idoralar vakillaridan iborat Ishchi guruhlar tashkil etilib va ular tomonidan bugungi kunda Respublikaning barcha hududlarda mavjud talablar o‘rganilmoqda.

 

Bugungi kunda respublikada 5 mln.dan ortiq o‘quvchi o‘rniga mo‘ljallangan 10 130 ta maktablarda 6 mln. 246 mingdan ortiq o‘quvchilar taʼlim olmoqda.

 

Vazirlik prognozlarga ko‘ra kelgusi 5 yillikda maktab o‘quvchilarining kutilayotgan soni 7,5 mlnga yetishi kutilmoqda.

 

Avvalroq, maktablarda Kembrij darsliklari joriy qilinishi hamda Nurafshonda Prezident maktabi ochilgani haqida xabar berilgandi. 

 

Munojat Valiyeva