OTM talabalari “Turizm va sport vaziri kubogi” uchun bellashdi
Final bosqichi o‘yinlariga Samarqand shahri mezbonlik qildi.
Bugungi kunda talaba-yoshlar o‘rtasida milliy sport turlarini rivojlantirish orqali yoshlarning sport bilan shug‘ullanishlari uchun barcha shart-sharoitlar yaratilgan. O‘z kuchi va imkoniyatiga ishonongan yoshlar uchun esa qator loyihalar amalga oshirilmoqda. Jumladan, Oliy taʼlim muassasalari talabalari o‘rtasida “Turizm va sport vaziri kubogi” musobaqasining o‘tkazilishi ham bu kabi loyihalarning yorqin ifodasidir.
Turizm va sport vazirligi axborot xizmati rahbari Lola Rahmonboyevaning Zamon.uz‘ga xabar qilishicha, bu galgi musobaqaning final bosqichi ko‘hna Samarqand shahrida bo‘lib o‘tdi.
Taʼkidlanishicha, “Ipak yo‘li” turizm va madaniy meros xalqaro universitetida bo‘lib o‘tgan ushbu musobaqada badminton, futbol, shaxmat, armrestling hamda kvest sport turlari bo‘yicha o‘tkazildi.
Maʼlumot uchun: musobaqaga 27-noyabr kuni start berildi va unda mingga yaqin talabalar g‘oliblik uchun kurash olib bordi.
Musobaqa yakunida Turizm va sport vazirligi mutasaddilari ishtirokida taqdirlash marosimi tashkil etildi.
Eslatib o‘tamiz, avvalroq yangi sport assotsiatsiyasi tashkil etilishi, Olimpiya qishlog‘ida O‘zbekiston bayrog‘i ko‘tarilgani, Bo‘stonliqda "Sky Camp" sport festivaliga start berilgani, I MDH o‘yinlarida belbog‘li kurashchilarimiz 11 ta medal bilan umumjamoa hisobida birinchi bo‘lishgani hamda xalqaro shaxmat turniri yakuniy bosqichga yetgani haqida xabar berilgandi.
