Patris Evra “yorildi”

 

“Manchester Yunayted”ning sobiq hujumchisi Robert Levandovski uchun afsusdaligini ochiqcha namoyish etdi. Uning fikricha “Oltin to‘p” topshirish marosimidagi bu qaror ko‘pchilik futbol muxlislarining eʼtirozlariga sabab bo‘lgan. Negaki, ular Messini bu gal ushbu mukofotga loyiq emas deb hisoblashmoqda.

 

“Menga “Oltin to‘p” uchun kimga ovoz berasiz deb so‘rashganida, shubhasiz, Robert Levandovskiga berardim. Bu bilan Messini yomonlamoqchi emasman. Shunchaki, adolat g‘alaba qozonishini istayman. “Manchester Yunayted” uch bor Chempionlar ligasi finalida “Barselona”ga imkniyatni boy berdi. Bu bilan kataloniyaliklarga bo‘lgan nafratimni namoyish qilmoqchi emasman. Ammo, “Barselona” chempionlikni qo‘lga kiritgan vaqtda nega Xavi yoki Inyesta “Oltin to‘p” sohibiga aylanishmadi. Ular ham jamoasining g‘alabalariga munosib hissa qo‘shishgandi. Muxlislar Krishtianu Ronaldu sizning do‘stingiz bo‘lgani sababli Messidan nafratlanasiz deb ko‘p aytishadi. Ammo, men bu haqda gaplashishni xohlamayman. “Oltin to‘p” toshirish marosimiga qaytadigan bo‘lsak, Messi mukofotni olib Levandovskiga qarata “Bu sovrinni sen o‘tgan yili yutishing kerak edi – dedi. Menimcha polshalik futbolchi bu yil ham “Oltin to‘p”ga loyiq edi. Odamlar ko‘zingizni oching. Futbolda korrupsiyaga yo‘l qo‘ymaylik”.

 

Eslatib o‘tamiz, ushbu mukofot 29 noyabr kuni yettinchi marta argentinalik hujumchi Lionel Messiga topshirildi. Ovoz berish natijasida  “Bavariya” hujumchisi Robert Levandovski ikkinchi, “Chelsi” yarim himoyachisi Jorjinyo uchinchi o‘rinni egalladi.

 

Avvalroq Robert Levandovski yangi rekord o‘rnatgani va polshalik futbolchi Messini “Oltin to‘p” sovrini bilan tabriklagani haqida xabar berilgandi.

 

Jamshidbek Amirov