O‘yinda oldinga siljishimiz qiyin bo‘ldi – Xavi
Xavi “Barselona”ning Ispaniya kubogini tark etganiga izoh berdi.
“O‘ylashimcha, “Atletik” ajoyib o‘yin o‘tkazdi. O‘yinda oldinga siljishimiz qiyin bo‘ldi. Ular juda yaxshi himoyalanishdi. Pedrining goli bizga qo‘shimcha bo‘limlarda kuch berdi. Ammo raqibning keyingi goli ortiqcha bo‘ldi. Jamoamiz bilan harakat qildik, ammo g‘alabaga erisha olmadik. Biz faqat ushbu loyihaga ishonishda davom etishimiz mumkin. Biz La Liga va Yevropa Ligasiga ishonishimiz kerak. Men ishlashdan boshqa yo‘lni bilmayman”, — deya “Marca” nashri Xavining so‘zlaridan iqtibos keltirdi.
Eslatib o‘tamiz, ushbu uchrashuv Bilbaodagi “San-Mames” stadionida bo‘lib o‘tdi va mezbonlarning 3:2 hisobidagi g‘alabasi bilan yakunlandi.
Maʼlumot o‘rnida: avvalgi turnirda “Barselona” g‘olib chiqqan edi. 2021 yilgi final o‘yinida jamoa “Atletik”ni 4:0 hisobida mag‘lub etgandi. “Barselona” Ispaniya kubogidagi g‘alabalar soni bo‘yicha rekordchi hisoblanadi. Jamoa 31 marta kubokni qo‘lga kiritgan.
Jamshidbek Amirov
