O‘g‘lining o‘limidan so‘ng Bosh prokuratura bilan sudlashayotgan ota vafot etdi
Bu muammo yuzasidan xodimning otasi kafolatlangan nafaqa pullari to‘lab berilmayotgani uchun Bosh prokuraturani sudga bergandi.
O‘tgan yilning aprel oyida O‘zbekiston Respublikasi Bosh prokuraturasining 33 yoshli xodimi Samir Rahmonov vafot etgani haqida xabar berilgandi.
Marhumning otasi Aʼzamjon Rahmonov o‘g‘li xizmat vazifasini bajarayotgan vaqtda ish joyida vafot etganligi, to‘rt nafar voyaga yetmagan farzandlari boquvchisiz qolgandi.
Islom huquqi bo‘yicha ustoz yuristlardan bo‘lgan Aʼzamjon Rahmonov o‘g‘lining ish joyida vafot etganligi sababli, Samirning 4 nafar voyaga yetmagan farzandlari va beva qolgan turmush o‘rtog‘i uchun Bosh prokuraturadan tovon puli undirishga harakat qilayotgandi.
Dastlabki daʼvo arizasi FIB Mirobod tumanlararo sudi tomonidan qanoatlantirishdan rad etilganidan so‘ng, marhumning otasi qonun ijrosi taʼminlanishi umidida qaror ustidan Toshkent shahar sudiga apellyatsiya berildi.
Apellyatsiya sudi FIB Mirobod tumanlararo sudining qarorini noqonuniy deb topib, uni bekor qilgan va yana qaytadan ko‘rish uchun ishni Mirobod sudiga yuborgan edi.
Maʼlum bo‘lishicha, ayni ish qayta ko‘rilayotgan bir vaqtda Aʼzamjon Rahmonov ham vafot etgan.
"Nima uchun bu voqeani eslayapmiz. Gap shundaki, bu sud ishini ko‘rish davomida Toshkent shahar sudi apellyatsiya sudlov hayʼati Samirbekning vafoti yuzasidan Bosh prokuratura foydasiga xulosa bergan mutaxassislar qonunchilikni buzgan degan fikrga kelgan. Mana shu vajlar ham qaysidir maʼnoda Samirbekni mehnat faoliyati bilan bog‘liq sabab tufayli vafot etganligini tasdiqlashi mumkin.
Shu sababli, Bosh prokuratura marhumning yaqinlariga to‘lovlarni, xususan, Mehnat kodeksining 194-moddasiga asosan 6 yillik o‘rtacha ish haqi miqdoridagi nafaqa to‘lovlari to‘lab bersa yaxshi bo‘lardi.
Hozir Samirbekdan qolgan farzandlarning taqdiri uchun sudma-sud yurgan, ularning asosiy himoyachisi Aʼzamjon aka ham olamdan o‘tdi. Vaziyat qay darajada achinarli ekanligi hammaga maʼlum", deb yozmoqda yurist Saidali Muxtoraliyev.
Muallif Bosh prokuraturada rahbarlik lavozimlarida tajribali, oqil va ko‘pchilikka ustoz bo‘lgan insonlar faoliyat yuritib kelishini eʼtirof etarkan, ularni muammoni marhum Samirbekning yaqinlari, xususan uning turmush o‘rtog‘i bilan o‘zaro kelishuv asosida, sudsiz hal qilishga chaqirgan.
Cho‘lponoy Ahmedova tayyorladi.
