“MY”ga Diyego Simeoneni bosh murabbiy etib tayinlash kerak”
“Qizil iblislar” sobiq futbolchisi Roy Kin ushbu taklif bilan chiqdi.
“Manchester Yunayted”ning sobiq yarim himoyachisi Roy Kin “MYU”ga “Atletiko” bosh murabbiyi Diyego Simeoneni taklif etish kerakligini aytdi:
“Manchester Yunayted”ga Simeoneni bosh murabbiy etib tayinlash kerak. U to‘g‘ri temperamentga ega. Simeone hozir “Atletiko”da qiyin damlarni boshdan kechirmoqda. Balki Diyegoning Madrid klubidagi faoliyati nihoyasiga yetayotgandir. U “Atletiko”da ajoyib ishlarni amalga oshirdi. Balki bu variant ish berishi mumkin”, - deya sobiq futbolchining so‘zlaridan “Mirror” nashri iqtibos keltirdi.
Eslatib o‘tamiz, UEFA Chempionlar ligasining 1/8 final bosqichi doirasida “Atletiko” o‘z maydonida “Manchester Yunayted”ni qabul qildi. Uchrashuv Madriddagi “Vanda Metropolitano” stadionida bo‘lib o‘tdi. O'yin 1:1 hisobidagi durang bilan yakunlandi. “Manchester Yunayted” va “Atletiko” o‘rtasidagi javob uchrashuvi 15 mart kuni Manchesterdagi “Old Trafford” stadionida bo‘lib o‘tadi.
Avvalroq, Markus Reshford Manchester universiteti tarixidagi eng yosh doktorga aylangani va Ronaldu beshinchi farzandini kutayotgani haqida xabar berilgandi.
Jamshidbek Amirov
