“Nasaf”ga belgilangan transfer taqiqi olib tashlandi
Klub fransiyalik futbolchi bilan shartnoma shartlarini bajarmagandi.
FIFA fransiyalik futbolchi Abdelaye Diakite bilan bog‘liq vaziyat uchun “Nasaf”ga belgilagan transfer taqiqini olib tashladi.
2021-yilning 7-oktabr kuni FIFA Nizolarni hal etish palatasi “Nasaf” jamoasi va fransiyalik futbolchi Abdelaye Diakite o‘rtasidagi nizoli vaziyat yuzasidan qaror chiqargan edi. Unga ko‘ra, “Nasaf” futbolchi bilan tuzilgan shartnoma shartlarini bajarmagan.
Qayd etilishicha, futbolchi FIFA‘ga murojaat qilgan va tashkilot “Nasaf” futbol klubi zimmasiga belgilangan qarzdorlik va jarima to‘lovlarini 45 kun mobaynida to‘lab bermagani sabab transfer taqiqi belgilagan edi.
“Nasaf” 24-fevral kuni ushbu futbolchi bilan qarzdorlikni to‘lash bo‘yicha tinchlik bitimi imzoladi va FIFA‘ga taqiqni olib tashlash bo‘yicha murojaat yubordi.
25-fevraldan eʼtiboran FIFA ushbu ish doirasida “Nasaf”dan transfer taqiqini olib tashladi.
Avvalroq, Qarshi klubi O‘zbekiston kubogini qo‘lga kiritgani haqida xabar berilgandi.
Jamshidbek Amirov
